صدر مملکت آصف علی زرداری نے بحیرہ روم میں غزہ جانے والے امدادی فلوٹیلا کو اسرائیلی فورسز کی جانب سے بین الاقوامی پانیوں میں روکنے کے اقدام کی شدید مذمت کی ہے۔ ایوان صدر سے جاری بیان کے مطابق صدر زرداری نے اس واقعے کو غزہ میں پہلے سے جاری انسانی بحران کے تناظر میں انتہائی تشویشناک قرار دیا ہے۔
صدر مملکت نے زیر حراست تمام کارکنوں کی حفاظت پر گہری تشویش کا اظہار کرتے ہوئے مطالبہ کیا ہے کہ ان کے حقوق اور فلاح و بہبود کا مکمل احترام یقینی بنایا جائے۔ انہوں نے اس بات پر زور دیا کہ انسانی امداد کی فراہمی میں کسی قسم کی رکاوٹ نہیں ڈالی جانی چاہیے۔
صدر زرداری نے غزہ میں متاثرہ شہری آبادی تک امداد کی فوری ترسیل کو یقینی بنانے کی ضرورت پر بھی زور دیا۔ انہوں نے عالمی برادری سے اپیل کی کہ وہ کشیدگی کو مزید بڑھنے سے روکنے اور انسانی ہمدردی کی بنیاد پر رسائی اور بحری نقل و حمل کی آزادی کے اصولوں کے تحفظ کے لیے اپنا کردار ادا کرے۔
