عسکری قیادت کا علاقائی کشیدگی کے تناظر میں تحمل اور ذمہ دارانہ رویے پر زور

راولپنڈی میں جی ایچ کیو کے اندر آرمی چیف جنرل سید عاصم منیر کی زیر صدارت 275 ویں کور کمانڈرز کانفرنس منعقد ہوئی جس میں علاقائی سلامتی کی صورتحال اور خطے میں کشیدگی پر تفصیلی غور کیا گیا۔ عسکری قیادت نے اس بات پر زور دیا کہ خطے میں بڑھتی ہوئی کشیدگی کے پیش نظر تحمل کا مظاہرہ کرنا اور صورتحال کو مزید بگڑنے سے روکنا وقت کی اہم ضرورت ہے۔

فورم نے اس عزم کا اظہار کیا کہ پاکستان خطے میں استحکام کے لیے اپنا ذمہ دارانہ کردار ادا کرتا رہے گا۔ اجلاس میں امریکہ اور ایران کے درمیان جاری کشیدگی اور اس کے علاقائی سلامتی پر مرتب ہونے والے اثرات کا بھی جائزہ لیا گیا۔ عسکری قیادت نے واضح کیا کہ خطے میں امن اور استحکام کا دارومدار اجتماعی ذمہ داری اور خودمختاری کے احترام پر ہے۔

کور کمانڈرز کانفرنس کے دوران معرکہ حق کی پہلی سالگرہ کے موقع پر قوم اور مسلح افواج کو مبارکباد پیش کی گئی۔ اس موقع کو قومی یکجہتی اور ملکی خودمختاری کے تحفظ کے لیے غیر متزلزل عزم کا مظہر قرار دیا گیا۔

اجلاس میں کہا گیا کہ معرکہ حق کی یاد منانا بھارتی سیاسی ذہنیت کے لیے ایک واضح پیغام ہے کہ پاکستانی قوم متحد اور کسی بھی جارحیت کا جواب دینے کے لیے ہمہ وقت تیار ہے۔ عسکری قیادت نے اس بات پر زور دیا کہ عوام، حکومت اور مسلح افواج کے درمیان اٹوٹ اتحاد ملک کو درپیش تمام اندرونی اور بیرونی چیلنجوں کے خلاف سیسہ پلائی ہوئی دیوار ثابت ہوگا۔