پنجاب: 7 سے 11 مئی تک شدید ہیٹ ویو کا الرٹ، درجہ حرارت 47 ڈگری تک جانے کا امکان

صوبائی ڈیزاسٹر مینجمنٹ اتھارٹی پنجاب نے سات سے گیارہ مئی تک صوبے بھر میں شدید گرمی کی لہر کا الرٹ جاری کر دیا ہے۔ محکمہ موسمیات کی پیش گوئی کے مطابق اس دوران درجہ حرارت میں غیر معمولی اضافے کا امکان ہے۔

اوپری پنجاب کے اضلاع بشمول لاہور، راولپنڈی، اٹک، جہلم اور سرگودھا میں درجہ حرارت انتالیس سے تینتالیس ڈگری سینٹی گریڈ تک رہنے کی توقع ہے۔ جنوبی پنجاب کے علاقے جن میں ڈیرہ غازی خان، بہاولپور اور رحیم یار خان شامل ہیں، شدید گرمی کی لپیٹ میں رہیں گے جہاں درجہ حرارت سینتالیس ڈگری سینٹی گریڈ تک پہنچ سکتا ہے۔

ریلیف کمشنر پنجاب نبیل جاوید نے تمام کمشنرز اور ڈپٹی کمشنرز کو ہائی الرٹ رہنے کی ہدایت کی ہے۔ انہوں نے خبردار کیا ہے کہ رات کے اوقات میں بھی درجہ حرارت معمول سے زیادہ رہے گا اور شدید گرمی کے باعث گرد آلود ہوائیں بھی چل سکتی ہیں۔

انتظامیہ نے شہریوں بالخصوص بچوں، خواتین اور معمر افراد کو غیر ضروری گھر سے باہر نکلنے سے گریز کرنے اور زیادہ سے زیادہ پانی پینے کا مشورہ دیا ہے۔ کسانوں کو ہدایت کی گئی ہے کہ وہ اپنی فصلوں اور مویشیوں کی حفاظت کے لیے پیشگی انتظامات مکمل کریں۔

ریسکیو گیارہ بائیس کو ہیٹ اسٹروک اور پانی کی کمی کے شکار افراد کی بروقت طبی امداد کے لیے الرٹ کر دیا گیا ہے۔ شہری علاقوں میں ریلیف کیمپوں کے قیام اور پینے کے صاف پانی کے ساتھ او آر ایس اور ابتدائی طبی امداد کی فراہمی یقینی بنانے کی ہدایت کی گئی ہے۔

پی ڈی ایم اے کے مطابق ہیٹ اسٹروک کے کیسز سے نمٹنے کے لیے موبائل ہیلتھ ٹیمیں متحرک رہیں گی۔ مزید برآں، درجہ حرارت میں اضافے کے باعث شمالی علاقوں میں برف پگھلنے کا عمل تیز ہونے کا بھی خدشہ ہے۔