معرکہ حق: پاک فضائیہ کی بھارت کے خلاف شاندار کامیابی کو ایک سال مکمل

اسلام آباد میں سات مئی کو معرکہ حق کی پہلی برسی انتہائی جوش و خروش سے منائی گئی، جس کا مقصد آپریشن بنیان المرصوص کے دوران پاکستان کی تاریخی فتح کی یاد تازہ کرنا ہے۔ سات مئی دو ہزار پچیس کو بھارت کی جانب سے بلا اشتعال جارحیت کا منہ توڑ جواب دیا گیا تھا۔

پاک فضائیہ نے اپنی پیشہ ورانہ مہارت کا عملی مظاہرہ کرتے ہوئے دشمن کے آٹھ طیارے مار گرائے جن میں تین جدید ترین رافیل جیٹ طیارے بھی شامل تھے۔ اس کارروائی نے بھارتی عسکری غرور کو خاک میں ملا دیا اور دشمن کو اپنی شکست تسلیم کرنے پر مجبور کر دیا۔

وفاقی وزیر دفاع خواجہ آصف نے اس موقع پر کہا کہ معرکہ حق نے پاکستان کی دفاعی صلاحیتوں اور قومی یکجہتی کا واضح پیغام دیا ہے۔ انہوں نے خبردار کیا کہ یہ فتح ایک ایسی فیصلہ کن لکیر ہے جس کے بعد دشمن کو کسی بھی مہم جوئی کا اس سے بھی زیادہ سخت جواب دیا جائے گا۔

اسپیکر پنجاب اسمبلی ملک احمد خان نے پریس کانفرنس سے خطاب کرتے ہوئے کہا کہ آپریشن بنیان المرصوص کی کامیابی نے عالمی سطح پر پاکستان کا وقار بلند کیا ہے۔ انہوں نے مزید کہا کہ اس تاریخی فتح نے نہ صرف دشمن کے تکبر کو پاش پاش کیا بلکہ قوم کو ایک ناقابل تسخیر وحدت میں پرو دیا۔

دنیا میڈیا گروپ نے بھی مسلح افواج اور پوری قوم کو اس شاندار کامیابی پر خراج تحسین پیش کیا ہے۔ اس موقع پر پنجاب بھر میں خصوصی تقریبات کا انعقاد کیا گیا جبکہ معرکہ حق پر مبنی کتاب بھی جاری کی گئی ہے جس میں پاکستان کی فیصلہ کن فتح کی تفصیلات درج ہیں۔