آزاد کشمیر میں یومِ حق کے موقع پر یومِ تشکر منایا گیا

مظفرآباد میں معرکہ حق میں بھارت کے خلاف پاکستان کی عظیم فتح کو ایک سال مکمل ہونے پر یوم تشکر کی پروقار تقریب منعقد ہوئی۔ تقریب کے مہمان خصوصی وزیراعظم آزاد جموں و کشمیر فیصل ممتاز راٹھور تھے۔ اس موقع پر جی او سی چنار ڈویژن اور پاکستان پیپلز پارٹی آزاد کشمیر کے صدر چوہدری محمد یاسین سمیت دیگر اہم شخصیات نے شرکت کی۔

تقریب میں سینئر وزیر میاں عبدالوحید، وزراء چوہدری یاسر سلطان، سید بزل علی نقوی اور نبیلہ ایوب کے علاوہ چیف سیکرٹری خوشحال خان، آئی جی لیاقت علی ملک اور سول و عسکری حکام بھی موجود تھے۔ شرکاء نے شہداء کی لازوال قربانیوں کو زبردست خراج تحسین پیش کیا۔

تقریب کے دوران معروف گلوکار علی عظمت اور آئمہ بیگ نے ملی نغمے پیش کرکے حاضرین کے دل موہ لیے، جبکہ بچوں کی جانب سے پیش کیے گئے ٹیبلو نے بھی سماں باندھ دیا۔ قومی کرکٹر محمد حارث کے علاوہ مقامی گلوکاروں راجہ عمران، عبدالباسط اور نتاشا خان نے بھی اپنے فن کا مظاہرہ کیا۔

وزیراعظم آزاد کشمیر اور جی او سی چنار ڈویژن نے شہداء کے لواحقین میں شیلڈز تقسیم کیں اور ان کی قربانیوں کو سلام پیش کیا۔ تقریب کے اختتام پر شاندار آتش بازی کا مظاہرہ کیا گیا۔ آپریشن بنیان مرصوص کی پہلی سالگرہ کے سلسلے میں آزاد کشمیر کے دیگر اضلاع اور تحصیلوں میں بھی پروقار تقریبات کا انعقاد کیا گیا۔

ان تقریبات میں عوام اور نوجوانوں نے بھرپور شرکت کی اور پاک فوج کو خراج تحسین پیش کیا۔ تعلیمی اداروں میں سیمینارز اور تقریری مقابلوں کا اہتمام کیا گیا، جن میں طلباء نے پاک فوج کی دفاعی صلاحیتوں کو اجاگر کیا اور شہداء کی قربانیوں کو یاد کیا۔