کھانوں کا مقابلہ: وسیم اکرم نے کراچی کو لاہور پر فوقیت دے دی

سابق کرکٹر اور لیجنڈری فاسٹ بولر وسیم اکرم نے کراچی اور لاہور کے مابین جاری روایتی کھانوں کی بحث میں اپنا فیصلہ سنا دیا ہے۔ سوشل میڈیا پر ایک ویڈیو پیغام میں وسیم اکرم کا کہنا تھا کہ دونوں شہروں کے کھانوں کے مابین جاری بحث پر وہ اپنی رائے دینے کے اہل ہیں کیونکہ ان کا تعلق دونوں شہروں سے گہرا ہے۔

وسیم اکرم نے مزاحیہ انداز میں کہا کہ وہ لاہور میں پیدا ہوئے اور 42 برس وہاں گزارے، جبکہ گزشتہ 14 برس سے وہ کراچی میں مقیم ہیں، اس لیے وہ اس بحث کو حتمی طور پر ختم کر سکتے ہیں۔ انہوں نے سیاستدان فواد چوہدری کے کراچی کے کھانوں سے متعلق تبصرے کا حوالہ دیتے ہوئے استفسار کیا کہ چوہدری صاحب آپ کون سا کراچی دیکھ رہے ہیں۔

کھانوں کے ذائقے پر بات کرتے ہوئے وسیم اکرم نے اعتراف کیا کہ لاہور کے کھانوں کی اپنی ایک تاریخ اور روایت ہے، تاہم انہوں نے کراچی کے کھانوں کو تنوع کے اعتبار سے فوقیت دی۔ ان کا کہنا تھا کہ کراچی میں مختلف ثقافتوں بشمول پشتون، بلوچ، پنجابی اور مقامی لوگوں کے امتزاج کی وجہ سے یہاں ہر قسم کا کھانا ایک ہی جگہ دستیاب ہوتا ہے جو اسے منفرد بناتا ہے۔

سابق کپتان نے لاہور کے کھانوں کے بارے میں رائے دیتے ہوئے کہا کہ وہاں کے کھانوں میں اب مصالحوں کا استعمال بہت زیادہ بڑھ چکا ہے۔ انہوں نے بادشاہی مسجد کے قریب فوڈ اسٹریٹ کے اپنے دورے کا ذکر کرتے ہوئے کہا کہ وہاں کے کھانوں میں مرچ اور کریم کا بے جا استعمال حیران کن ہے۔

ویڈیو کے آخر میں وسیم اکرم نے اس بحث کو سمیٹتے ہوئے کہا کہ لاہور میں بلاشبہ بہترین کھانے موجود ہیں لیکن کراچی میں کھانوں کا تنوع کہیں زیادہ ہے۔ انہوں نے پنجابی میں مزاحیہ انداز میں مداحوں سے درخواست کی کہ ان کی رائے پر کوئی ان کے پیچھے نہ پڑے۔ یہ بحث پاکستان کے دو بڑے شہروں کے درمیان چلنے والی اس روایتی کشمکش کی عکاس ہے جہاں کراچی اپنے تنوع اور لاہور اپنی تاریخی روایات اور مصالحہ دار کھانوں کے باعث اپنی الگ شناخت رکھتا ہے۔