ڈیرہ نواب کے قریب نہر میں شگاف، سینکڑوں ایکڑ پر کھڑی فصلیں تباہ

ڈیرہ نواب کے قریب نہر میں شگاف پڑنے سے مکئی اور دیگر موسمی فصلیں تباہ ہوگئیں۔ حکام کے مطابق پانی کے تیز بہاؤ نے کئی ایکڑ رقبے پر کھڑی فصلوں کو اپنی لپیٹ میں لے لیا ہے۔

پنجاب ایمرجنسی سروس ریسکیو 1122 کے حکام کا کہنا ہے کہ ڈیرہ نواب سے گلاب کی جانب جانے والی نہر کے پشتے میں بڑا شگاف پڑا جس سے قریبی رہائشی آبادیوں اور بنیادی ڈھانچے کو خطرات لاحق ہو گئے ہیں۔

واقعے کی اطلاع ملتے ہی ریسکیو کنٹرول روم نے ہنگامی بنیادوں پر امدادی ٹیمیں جائے وقوعہ پر روانہ کر دیں۔ ابتدائی اطلاعات کے مطابق شگاف کی لمبائی 10 سے 12 فٹ کے درمیان ہے جس کے باعث پانی تیزی سے آبادی کی جانب بڑھ رہا ہے۔

انتظامیہ کو خدشہ ہے کہ پانی کے اس بے قابو بہاؤ سے مزید زرعی اراضی کو نقصان پہنچ سکتا ہے اور سیلابی صورتحال پیدا ہو سکتی ہے۔ ریسکیو ٹیمیں متاثرہ مقام پر امدادی کارروائیوں میں مصروف ہیں۔