پاکستان اور بنگلہ دیش کا منشیات سمگلنگ اور دہشت گردی کے خاتمے کیلئے تاریخی معاہدہ

پاکستان اور بنگلہ دیش نے منشیات کی سمگلنگ، سائبر کرائم، دہشت گردی اور انسانی سمگلنگ کے خلاف باہمی تعاون کو فروغ دینے کے لیے ڈھاکا میں ایک اہم مفاہمت کی یادداشت پر دستخط کر دیے ہیں۔ وفاقی وزیر داخلہ و انسداد منشیات محسن نقوی نے ہفتے کے روز ڈھاکا میں اپنے بنگلہ دیشی ہم منصب صلاح الدین احمد سے ملاقات کی۔

ملاقات کے دوران دونوں ممالک کے وزرائے داخلہ نے سیکرٹری سطح پر مشترکہ ورکنگ گروپ قائم کرنے پر اتفاق کیا ہے۔ یہ گروپ سرحد پار منشیات کی غیر قانونی نقل و حمل، خرید و فروخت اور سپلائی کو روکنے کے لیے مربوط کوششیں کرے گا۔ اس معاہدے کے تحت دونوں ممالک منشیات کی سمگلنگ کے نیٹ ورکس کے بارے میں بروقت خفیہ معلومات کا تبادلہ کریں گے اور سپلائی چین کو توڑنے کے لیے مشترکہ حکمت عملی وضع کریں گے۔

وزیر داخلہ محسن نقوی نے بنگلہ دیش کے سیف سٹی پروجیکٹ کے لیے مکمل تعاون کی پیشکش کی اور ہر سطح پر مدد فراہم کرنے کی یقین دہانی کرائی۔ بنگلہ دیشی وزیر داخلہ نے اس تعاون پر محسن نقوی کا شکریہ ادا کیا۔

دونوں رہنماؤں نے داخلی سلامتی، سول مسلح افواج کی تربیت، دہشت گردی کے خاتمے اور انسانی سمگلنگ کے خلاف اقدامات پر گہرے تعلقات قائم کرنے کے عزم کا اعادہ کیا۔ اس کے علاوہ سائبر کرائم، منظم جرائم اور مالیاتی فراڈ کے تدارک کے لیے تعاون بڑھانے پر بھی تفصیلی تبادلہ خیال کیا گیا۔

ملاقات میں پولیس اکیڈمیوں کے درمیان تعاون بڑھانے اور افسران کے لیے خصوصی تربیتی پروگرام شروع کرنے کے امکانات پر بھی غور کیا گیا۔ وفاقی وزیر محسن نقوی نے بنگلہ دیشی وزیر داخلہ کو دورہ پاکستان کی دعوت بھی دی۔

اس موقع پر بنگلہ دیش کے سیکرٹری خارجہ اسد عالم سیام، کابینہ سیکرٹری نسیم الغنی، سیکرٹری داخلہ منظور چوہدری اور بنگلہ دیش میں تعینات پاکستان کے ہائی کمشنر عمران حیدر بھی موجود تھے۔