پاکستانی افواج دھمکیوں کے سامنے کبھی سر نہیں جھکائیں گی، آرمی چیف جنرل عاصم منیر

راولپنڈی میں جنرل ہیڈ کوارٹرز میں معرکہ حق کی فتح کی یاد میں ایک پروقار تقریب کا انعقاد کیا گیا جس میں اعلیٰ عسکری قیادت نے شرکت کی۔ چیف آف ڈیفنس فورسز فیلڈ مارشل سید عاصم منیر تقریب کے مہمان خصوصی تھے جبکہ فضائیہ کے سربراہ نوید اشرف اور دیگر اعلیٰ فوجی حکام بھی اس موقع پر موجود تھے۔

تقریب کا آغاز یادگار شہدا پر پھول چڑھانے اور شہدا کو خراج عقیدت پیش کرنے سے ہوا۔ تینوں مسلح افواج کے چاق و چوبند دستوں نے سلامی پیش کی جس کے بعد آپریشن بنیان المرصوص کے نام کی بنیاد بننے والی قرآنی آیت کی تلاوت کی گئی۔

فیلڈ مارشل سید عاصم منیر نے تقریب سے خطاب کرتے ہوئے کہا کہ معرکہ حق محض دو ممالک کے درمیان جنگ نہیں بلکہ دو نظریات کا تصادم تھا جس میں حق کی فتح ہوئی۔ انہوں نے کہا کہ چھ اور سات مئی کی رات سے دس مئی تک دشمن نے پاکستان کے عزم اور وقار کو آزمانے کی ناکام کوشش کی۔

چیف آف ڈیفنس فورسز نے واضح کیا کہ بھارت کے عزائم اس کی حیثیت اور صلاحیتوں سے کہیں زیادہ ہیں اور پاکستان بھارت کے کسی بھی ایسے خواب کو کبھی شرمندہ تعبیر نہیں ہونے دے گا۔ انہوں نے کہا کہ دشمن بھول گیا ہے کہ پاکستان کی مسلح افواج نہ ماضی میں طاقت کے سامنے جھکی ہیں اور نہ مستقبل میں ایسا ہوگا۔

فیلڈ مارشل عاصم منیر نے کہا کہ معرکہ حق کے دوران بھارت کو شدید جانی و مالی نقصان اٹھانا پڑا جس کی قیمت وہ مستقبل میں بھی ادا کرتا رہے گا۔ انہوں نے بتایا کہ پاکستان کے اسٹریٹجک میزائل اور شاہین سسٹمز نے دشمن کے چھبیس سے زائد فوجی اہداف کو کامیابی سے نشانہ بنایا۔

انہوں نے اس عزم کا اعادہ کیا کہ پاکستان کا دفاع مکمل طور پر ناقابل تسخیر ہے اور کسی بھی مستقبل کی جارحیت کا جواب انتہائی تکلیف دہ نتائج کی صورت میں دیا جائے گا۔ تقریب کے دوران انہوں نے معرکہ حق میں شہید ہونے والی خواتین، بزرگوں اور بچوں کی قربانیوں کو بھی خراج تحسین پیش کیا۔

سربراہ عسکری قیادت نے مزید کہا کہ پوری قوم نے وطن کے دفاع میں سیسہ پلائی ہوئی دیوار کا کردار ادا کیا۔ انہوں نے واضح کیا کہ پاکستان اپنی خودمختاری، علاقائی سالمیت اور قومی وقار پر کسی قسم کا سمجھوتہ نہیں کرے گا کیونکہ قوم اور قیادت کا پیغام بالکل واضح ہے۔