پاک فوج کا مقابلہ کوئی طاقت نہیں کر سکتی، وزیراعلیٰ سندھ مراد علی شاہ

وزیراعلیٰ سندھ سید مراد علی شاہ نے کہا ہے کہ دنیا کی کوئی طاقت پاکستان کی مسلح افواج کی پیشہ ورانہ صلاحیتوں کا مقابلہ نہیں کر سکتی۔ انہوں نے اس عزم کا اعادہ کیا کہ مادر وطن کے دفاع کے لیے پوری قوم اپنی فوج کے شانہ بشانہ کھڑی ہے۔

یہ خیالات کا اظہار انہوں نے کراچی نیول ڈاک یارڈ میں منعقدہ ایک خصوصی تقریب سے خطاب کرتے ہوئے کیا۔ یہ تقریب معرکہ حق کی کامیابی کا ایک سال مکمل ہونے کے موقع پر منعقد کی گئی۔ اس موقع پر اعلیٰ حکومتی اور عسکری حکام بھی موجود تھے۔

وزیراعلیٰ سندھ نے یادگار شہداء پر پھول چڑھائے اور ملک و قوم کے لیے جانوں کا نذرانہ پیش کرنے والے بہادر سپوتوں کو خراج تحسین پیش کیا۔ انہوں نے کہا کہ بنیان مرصوص کی کامیابی نے دنیا پر واضح کر دیا ہے کہ پاکستان کی جانب میلی آنکھ سے دیکھنے والوں کو منہ توڑ جواب دیا جائے گا۔

سید مراد علی شاہ کا کہنا تھا کہ گزشتہ برس کے واقعات کے دوران دنیا نے پاکستان کی عسکری قوت اور پیشہ ورانہ مہارت کا عملی مشاہدہ کیا ہے۔ انہوں نے مزید کہا کہ ملکی خود مختاری ہماری اولین ترجیح ہے اور اس پر کسی قسم کا سمجھوتہ نہیں کیا جائے گا۔

وزیراعلیٰ نے اپنے خطاب میں اس بات پر زور دیا کہ پاکستان ایک پرامن ملک ہے، تاہم اگر ملکی خودمختاری کو کسی بھی جانب سے خطرہ لاحق ہوا تو اس کا فیصلہ کن جواب دیا جائے گا۔ انہوں نے شہداء اور غازیوں کو قوم کا فخر قرار دیتے ہوئے ان کی قربانیوں کو زبردست الفاظ میں سراہا۔