عدالت: والدہ کی دوسری شادی بچوں کی حوالگی منسوخ کرنے کی بنیاد نہیں

وفاقی آئینی عدالت نے نو سالہ بچے کی حوالگی سے متعلق چچا اور تائی کی جانب سے دائر کی گئی درخواست مسترد کر دی ہے۔ عدالت نے اپنے فیصلے میں واضح کیا ہے کہ محض والدہ کی دوسری شادی کی بنیاد پر بچے کی کسٹڈی تبدیل نہیں کی جا سکتی اور قانونی طور پر بچے کی فلاح و بہبود ہی بنیادی اصول ہے۔

مقدمے کی سماعت جسٹس حسن اظہر رضوی کی سربراہی میں تین رکنی بینچ نے کی۔ سماعت کے دوران جسٹس حسن اظہر رضوی نے استفسار کیا کہ چچا اور تائی کس بنیاد پر بچے کی حوالگی کے خواہشمند ہیں اور کیا انہوں نے ماضی میں کبھی بچے کی تعلیم یا اس کی کفالت کے بارے میں دریافت کیا ہے۔

درخواست گزار کے وکیل نے موقف اختیار کیا کہ بچے کی والدہ نے دوسری شادی کر لی ہے جس پر عدالت نے ریمارکس دیے کہ صرف اس بنیاد پر بچے کی کسٹڈی تبدیل نہیں کی جا سکتی۔

وکیل کی جانب سے عدالت کو یہ بھی بتایا گیا کہ والدہ نے والد کی جانب سے بچے کو ملنے والا حصہ فروخت کر دیا ہے۔ تاہم عدالت نے اس تمام صورتحال کا جائزہ لینے کے بعد قرار دیا کہ کسٹڈی کے معاملات کا فیصلہ صرف اور صرف بچے کے بہترین مفاد کو مدنظر رکھ کر کیا جاتا ہے اور ان الفاظ کے ساتھ عدالت نے درخواست خارج کر دی۔