پاکستان اسٹاک ایکسچینج میں مندی کا رجحان، کے ایس ای-100 انڈیکس میں اتار چڑھاؤ

پاکستان اسٹاک ایکسچینج میں پیر کے روز کاروبار کے دوران شدید اتار چڑھاؤ کا سلسلہ جاری رہا اور فروخت کے دباؤ کے باعث کے ایس ای 100 انڈیکس میں گراوٹ دیکھی گئی۔ دوپہر ایک بج کر 54 منٹ پر انڈیکس 63.96 پوائنٹس یا 0.04 فیصد کی کمی کے ساتھ 171,051.86 پوائنٹس پر ٹریڈ کرتا رہا۔

کاروبار کا آغاز مایوس کن رہا اور صبح 9 بج کر 34 منٹ پر انڈیکس 1,433.57 پوائنٹس یعنی 0.84 فیصد گر کر 169,682.25 پوائنٹس پر آ گیا تھا۔ ہیوی ویٹ سیکٹرز میں فروخت کی وجہ سے مارکیٹ پر دباؤ رہا تاہم بعد ازاں انڈیکس نے جزوی بحالی کی کوشش بھی کی۔ صبح 9 بج کر 44 منٹ پر خسارہ کم ہو کر 917.20 پوائنٹس رہ گیا جبکہ 9 بج کر 59 منٹ پر انڈیکس 866.65 پوائنٹس کی کمی کے ساتھ 170,249.17 پوائنٹس پر موجود تھا۔

صبح 10 بج کر 4 منٹ پر فروخت کا دباؤ دوبارہ بڑھنے سے انڈیکس 1,085.62 پوائنٹس کی تنزلی کے ساتھ 170,030.20 پوائنٹس پر آ گیا۔ دن کے وسط میں ویلیو بائنگ کے باعث انڈیکس نے کچھ دیر کے لیے مثبت رخ اختیار کیا لیکن منافع بخش فروخت کے دوبارہ شروع ہونے سے تیزی برقرار نہ رہ سکی۔ سیمنٹ، کمرشل بینکوں، تیل و گیس کی تلاش، او ایم سی اور پاور جنریشن سیکٹرز میں فروخت دیکھی گئی۔ سرمایہ کاروں کا محتاط رویہ ایران اور امریکہ کے درمیان ممکنہ امن معاہدے سے متعلق غیر یقینی صورتحال کا نتیجہ ہے۔

مجموعی طور پر مارکیٹ میں اتار چڑھاؤ کا رجحان غالب رہا۔ انڈیکس نے دورانِ ٹریڈنگ 171,304.10 کی بلند ترین اور 169,583.44 کی نچلی سطح کو چھوا۔ سیشن کے دوران 322.08 ملین حصص کا لین دین ہوا جن کی مالیت 12.62 ارب روپے رہی جبکہ گزشتہ بندش 171,115.82 پوائنٹس پر ہوئی تھی۔

اسٹیٹ بینک آف پاکستان کی جانب سے جاری کردہ اعداد و شمار کے مطابق اپریل 2026 میں پاکستان کو موصول ہونے والی ترسیلات زر 3.5 ارب ڈالر رہیں، جس میں سالانہ بنیادوں پر 11.4 فیصد کا اضافہ ہوا تاہم ماہانہ بنیادوں پر ان میں 7.6 فیصد کی کمی ریکارڈ کی گئی۔