پنجاب کابینہ نے 16 سے 18 سال کے نوجوانوں کے لیے موٹرسائیکل چلانے کا خصوصی پرمٹ سسٹم متعارف کرانے کی منظوری دے دی ہے۔ اس اقدام کا مقصد کم عمر ڈرائیوروں کو قانونی دائرہ کار میں لانا اور سڑکوں پر ٹریفک قوانین کی پاسداری کو یقینی بنانا ہے۔
صوبائی کابینہ کے اجلاس میں موٹر وہیکل قوانین اور رولز میں ترامیم کی باقاعدہ منظوری دی گئی۔ نئی پالیسی کے تحت 16 سے 18 سال کے نوجوانوں کو مکمل ڈرائیونگ لائسنس کے بجائے ایک مخصوص اجازت نامہ جاری کیا جائے گا جس کے تحت وہ قانونی طور پر موٹرسائیکل چلا سکیں گے۔
محکمہ داخلہ پنجاب نے پنجاب موٹر وہیکل آرڈیننس 1965 کی شق نمبر 4 میں ترمیم کی تجویز پیش کی تھی جس پر عمل درآمد کے لیے پنجاب موٹر وہیکل ترمیمی ایکٹ 2026 کو قانونی بنیاد بنایا گیا ہے۔ اس کے ساتھ ہی پنجاب موٹر وہیکل رولز 1969 میں بھی ضروری تبدیلیاں کی گئی ہیں تاکہ انتظامی امور کو نئے پرمٹ سسٹم سے ہم آہنگ کیا جا سکے۔
حکومتی ترجمان کے مطابق یہ فیصلہ اسکول اور کالج جانے والے طلبا کی نقل و حمل کی ضروریات اور عوامی تحفظ کے درمیان توازن قائم کرنے کے لیے کیا گیا ہے۔ اس نئے نظام کا مقصد نوجوانوں میں ٹریفک نظم و ضبط کو فروغ دینا اور بغیر لائسنس ڈرائیونگ کے رجحان کو ختم کرنا ہے۔
حکام کا کہنا ہے کہ پرمٹ کے اجرا کا عمل ٹرانسپورٹ اور لائسنسنگ محکموں کے ضوابط مکمل ہونے کے بعد شروع کیا جائے گا۔ تمام قانونی تقاضے پورے ہونے اور قواعد و ضوابط کے نوٹیفکیشن کے بعد اس نظام کو صوبے بھر میں نافذ کر دیا جائے گا۔
