ریاستی ڈیزاسٹر مینجمنٹ اتھارٹی نے مظفرآباد میں دریائی بہاؤ میں غیر معمولی اضافے کے پیش نظر سیلابی خطرے کی وارننگ جاری کر دی ہے۔ حکام کو ہنگامی بنیادوں پر حفاظتی اقدامات اٹھانے کی ہدایت کی گئی ہے۔
بھارت کے غیر قانونی زیر قبضہ جموں و کشمیر سے آنے والے دریاؤں میں پانی کی سطح میں نمایاں اضافہ ریکارڈ کیا گیا ہے جس کے بعد سیلابی صورتحال کا خدشہ پیدا ہو گیا ہے۔
ایس ڈی ایم اے کی جانب سے تمام ڈپٹی کمشنرز کو مراسلہ جاری کیا گیا ہے جس میں انسانی جانوں کے تحفظ کو یقینی بنانے کے لیے موثر اقدامات کرنے کا حکم دیا گیا ہے۔
ضلعی انتظامیہ کو ہدایت کی گئی ہے کہ دریاؤں اور ندی نالوں کے قریب عوامی نقل و حرکت پر پابندی عائد کی جائے۔ حساس مقامات کی نشاندہی کر کے وہاں پولیس اور انتظامی عملے کی تعیناتی یقینی بنائی جائے۔
ایس ڈی ایم اے نے کسی بھی ہنگامی صورتحال سے نمٹنے کے لیے ریسکیو اداروں اور متعلقہ محکموں کو الرٹ رہنے کی بھی ہدایت جاری کر دی ہے۔
