وزیر اعظم شہباز شریف نے لاہور میں جاتی امرا کا دورہ کیا جہاں انہوں نے مسلم لیگ ن کے صدر نواز شریف سے اہم ملاقات کی۔ اس نشست میں ملکی سیاسی صورتحال، معاشی امور اور حکومت کی آئندہ کی حکمت عملی پر تفصیلی تبادلہ خیال کیا گیا۔
ملاقات میں نائب وزیر اعظم اسحاق ڈار اور وزیر اعلیٰ پنجاب مریم نواز بھی موجود تھیں۔ ذرائع کے مطابق اجلاس کے دوران ملک کی مجموعی سیاسی اور معاشی حالات کا تفصیلی جائزہ لیا گیا۔
اسحاق ڈار نے نواز شریف کو پیٹرولیم مصنوعات کی قیمتوں میں حالیہ اضافے کے محرکات اور وجوہات پر بریفنگ دی۔ اس موقع پر نواز شریف نے عوام کی مشکلات پر گہری تشویش کا اظہار کرتے ہوئے ہدایت کی کہ عام آدمی کو ریلیف فراہم کرنے کے لیے ہر ممکن اقدامات کیے جائیں اور کم آمدنی والے طبقے کو مہنگائی کے اثرات سے بچانے کے لیے ترجیحی بنیادوں پر کام کیا جائے۔
اجلاس میں آزاد جموں و کشمیر اور گلگت بلتستان میں ہونے والے آئندہ انتخابات کے حوالے سے بھی مشاورت کی گئی۔ اس کے علاوہ نواز شریف کو ایران اور امریکہ کے درمیان جاری مذاکرات میں قومی قیادت کی پس پردہ کوششوں اور پیش رفت سے بھی آگاہ کیا گیا۔
