بلوچستان کے ضلع بارکھان میں سیکیورٹی فورسز نے خفیہ اطلاع پر آپریشن کے دوران بھارت کے حمایت یافتہ سات دہشت گردوں کو ہلاک کر دیا ہے۔ پاک فوج کے شعبہ تعلقات عامہ آئی ایس پی آر کے مطابق کارروائی کے دوران شدید فائرنگ کے تبادلے میں میجر توصیف احمد بھٹی سمیت پانچ سیکیورٹی اہلکار جام شہادت نوش کر گئے ہیں۔
ترجمان پاک فوج کے مطابق آپریشن بارکھان کے علاقے نوشام میں پاک فوج اور فرنٹیئر کور بلوچستان کی جانب سے مشترکہ طور پر کیا گیا۔ اس کارروائی کا مقصد فتنہ الہند سے منسلک دہشت گردوں کے ٹھکانوں کا خاتمہ کرنا تھا۔ آپریشن کے دوران سیکیورٹی فورسز نے دہشت گردوں کے ٹھکانوں کو کامیابی سے تباہ کیا اور ان کے قبضے سے اسلحہ، گولہ بارود اور دھماکہ خیز مواد کا بڑا ذخیرہ برآمد کر لیا ہے۔
شہید ہونے والوں میں میجر توصیف احمد بھٹی کے علاوہ فدا حسین، ذاکر حسین، سہیل احمد اور محمد ایاز شامل ہیں۔ آئی ایس پی آر کا کہنا ہے کہ علاقے میں باقی ماندہ دہشت گردوں کے خاتمے کے لیے سرچ آپریشن تاحال جاری ہے۔
بیان میں مزید کہا گیا ہے کہ عزم استحکام مہم کے تحت دہشت گردی کے مکمل خاتمے تک کارروائیاں جاری رہیں گی۔ سیکیورٹی فورسز بھارتی حمایت یافتہ دہشت گردی کی لعنت کو جڑ سے اکھاڑ پھینکنے کے لیے پرعزم ہیں اور وطن کے دفاع میں جانوں کا نذرانہ پیش کرنے والے جوانوں کی قربانیوں کو رائیگاں نہیں جانے دیا جائے گا۔
