یوکرین کی ڈرون ٹیکنالوجی اسٹارٹ اپ کی نیس ڈیک پر شاندار انٹری، حصص کی قیمت میں 700 فیصد اضافہ

یوکرین سے تعلق رکھنے والی ڈرون ٹیکنالوجی کمپنی سوارمر نے نیس ڈیک پر اپنے پہلے کاروباری روز تاریخ ساز کارکردگی کا مظاہرہ کیا ہے۔ منگل کے روز ٹریڈنگ کے دوران کمپنی کے حصص کی قیمت میں 700 فیصد سے زائد کا غیر معمولی اضافہ دیکھا گیا اور کاروبار کے اختتام پر ایک شیئر 31 ڈالر پر بند ہوا۔

آسٹن، ٹیکساس میں قائم اس کمپنی کا سافٹ ویئر ایک ہی پائلٹ کو بیک وقت سینکڑوں ڈرونز کنٹرول کرنے کی صلاحیت فراہم کرتا ہے۔ یہ ٹیکنالوجی 2024 سے یوکرینی فوج کے زیر استعمال ہے۔ گزشتہ ماہ بلیک واٹر کے بانی ایرک پرنس نے کمپنی کے نان ایگزیکٹو چیئرمین کے طور پر ذمہ داریاں سنبھالی ہیں۔

ایرک پرنس نے شیئر ہولڈرز کے نام اپنے خط میں سوارمر کی کامیابی کو میدانِ جنگ کے حقیقی تجربات کا نتیجہ قرار دیا۔ ان کا کہنا ہے کہ اس پلیٹ فارم نے یوکرین میں ایک لاکھ سے زائد مشنز میں حصہ لیا ہے، جس سے حاصل ہونے والا ڈیٹا اور مشین لرننگ ماڈلز اسے لیبارٹری میں تیار کردہ ٹیکنالوجی سے کہیں زیادہ برتر بناتے ہیں۔

یوکرینی دفاعی کمپنیاں طویل عرصے سے سرمایہ کاری کی کمی کا شکار رہی ہیں۔ اعداد و شمار کے مطابق 2025 میں یوکرین کی دفاعی صنعت کی پیداواری صلاحیت 35 ارب ڈالر تک پہنچ گئی تھی، تاہم اسے صرف 6.1 ارب ڈالر کی غیر ملکی فنڈنگ مل سکی۔ برآمدی پابندیوں نے ان کمپنیوں کی ترقی کی راہ میں رکاوٹیں کھڑی کر رکھی ہیں۔

اب یوکرینی کمپنیاں امریکی شراکت داروں اور وہاں کاروبار کے اندراج کے ذریعے ان مسائل کا حل نکال رہی ہیں۔ ماضی میں مائیک پومپیو جیسے اہم امریکی شخصیات کا یوکرینی دفاعی کمپنیوں کے بورڈز میں شامل ہونا اسی حکمت عملی کا حصہ ہے۔ پینٹاگون بھی اب یوکرین کی سستی اور موثر ڈرون ٹیکنالوجی میں گہری دلچسپی لے رہا ہے تاکہ اپنے مہنگے دفاعی نظام کا متبادل تلاش کیا جا سکے۔

حال ہی میں پینٹاگون کے ڈرون ڈومیننس پروگرام کے تحت جارجیا میں منعقدہ مقابلے میں یوکرینی کمپنی اسکائی فال نے کامیابی حاصل کر کے پینٹاگون کے ٹھیکے حاصل کرنے کی راہ ہموار کر لی ہے۔ ایرک پرنس کا ماننا ہے کہ سوارمر جیسی کمپنیاں جنگ کے میدان میں ثابت شدہ ٹیکنالوجی فراہم کر رہی ہیں جو روایتی مہنگے دفاعی سازوسامان کا ایک بہترین اور سستا متبادل ثابت ہوں گی۔