اوپن اے آئی نے اپنی ویڈیو جنریٹنگ ایپ ‘سورا’ کو بند کرنے کا اعلان کر دیا

اوپن اے آئی نے اپنی ویڈیو جنریشن ایپ سورا کو بند کرنے کا اعلان کر دیا ہے۔ وال اسٹریٹ جرنل کی رپورٹ کے مطابق صارفین میں اس پلیٹ فارم کی مقبولیت میں کمی کے باعث کمپنی نے یہ فیصلہ کیا ہے۔

اوپن اے آئی کے ترجمان نے سی بی ایس نیوز کو جاری کردہ بیان میں کہا ہے کہ کمپنی نے کنزیومر ایپ اور اے پی آئی سے سورا کو ختم کرنے کا فیصلہ کیا ہے۔ ترجمان کے مطابق کمپنی اب اپنی توجہ اور کمپیوٹنگ وسائل کو روبوٹکس کے شعبے میں تحقیق پر مرکوز کر رہی ہے تاکہ حقیقی دنیا کے پیچیدہ کاموں کو حل کرنے میں مدد مل سکے۔

کمپنی نے سوشل میڈیا پر اپنے صارفین کا شکریہ ادا کرتے ہوئے اس فیصلے پر مایوسی کا اظہار کرنے والوں سے ہمدردی کا اظہار کیا ہے۔

اے آئی ویڈیو ایپس اپنی فوری ویڈیوز تخلیق کرنے کی صلاحیت کی وجہ سے ٹیکنالوجی کے مداحوں میں مقبول رہی ہیں، تاہم ان کے ذریعے حقیقی اور جعلی تصاویر میں فرق کرنا مشکل ہونے پر تنقید بھی کی جاتی رہی ہے۔

سنہ 2025 کے دوران سورا اس وقت تنازع کی زد میں آئی تھی جب کچھ صارفین نے سول رائٹس رہنما مارٹن لوتھر کنگ جونیئر کی توہین آمیز ویڈیوز تیار کی تھیں۔ اس واقعے کے بعد کمپنی نے صارفین پر مارٹن لوتھر کنگ کی شبیہ استعمال کرنے پر عارضی پابندی عائد کر دی تھی۔