بھارت میں ایندھن کا شدید بحران، پیٹرول پمپس پر گاڑیوں کی لمبی قطاریں

بھارت میں ایندھن کا شدید بحران پیدا ہو گیا ہے جس کے باعث ملک بھر میں پیٹرول اور ڈیزل پمپس پر گاڑیوں کی لمبی قطاریں لگ گئی ہیں۔ گیس کی قلت کے بعد ایندھن کی عدم دستیابی نے شہریوں کی مشکلات میں مزید اضافہ کر دیا ہے۔

صورتحال کو قابو میں رکھنے کے لیے مختلف علاقوں میں پولیس کو تعینات کیا گیا ہے تاکہ ہجوم کو منتشر کیا جا سکے اور کسی بھی ناخوشگوار واقعے سے بچا جا سکے۔ پمپس پر ایندھن کے حصول کے لیے شہریوں کو چوبیس گھنٹے تک انتظار کرنا پڑ رہا ہے جس سے عوام میں شدید اضطراب پایا جاتا ہے۔

شہریوں کی جانب سے مودی حکومت کی ناقص توانائی پالیسیوں اور بدانتظامی پر کڑی تنقید کی جا رہی ہے۔ دوسری جانب حکومتی عہدیداران مسلسل اس بات پر بضد ہیں کہ ملک میں ایندھن کی کوئی قلت نہیں ہے، تاہم زمینی حقائق حکومتی دعووں کی نفی کر رہے ہیں۔

طویل قطاروں اور ایندھن کی عدم دستیابی نے بڑے شہروں کے رہائشیوں کو شدید ذہنی دباؤ میں مبتلا کر دیا ہے۔ بڑھتے ہوئے بحران کے پیش نظر کئی شہریوں نے اب بڑے شہروں سے چھوٹے قصبوں اور دیہاتوں کی جانب واپسی پر غور کرنا شروع کر دیا ہے۔