ہیری پوٹر کی نئی سیریز کرسمس 2026 پر ایچ بی او میکس پر نشر کی جائے گی

وارنر برادرز ڈسکوری نے ہیری پوٹر سیریز کے نئے پروجیکٹ کا باقاعدہ اعلان کر دیا ہے جس کے ساتھ ہی اس کا عنوان، ٹیزر اور عالمی سطح پر ریلیز کی تاریخ بھی سامنے آ گئی ہے۔

ہیری پوٹر اینڈ دی فلاسفرز اسٹون کے نام سے تیار کی جانے والی یہ سیریز کرسمس کے دن 2026 کو ایچ بی او میکس پر پوری دنیا میں نشر کی جائے گی۔ اس سیریز کا آغاز لندن میں ایک خصوصی تقریب سے ہوگا۔

دو منٹ پر محیط ٹیزر میں ہیری، رون، ہر مائنی، ڈریکو، اسنیپ اور ہیگرڈ جیسے مرکزی کرداروں کو متعارف کرایا گیا ہے۔ ٹیزر میں دکھایا گیا ہے کہ ہیری اسکول میں بدسلوکی کا شکار ہوتا ہے جس کے بعد وہ جادوئی دنیا میں قدم رکھتا ہے۔ اس دوران ہیگرڈ اسے بتاتے ہیں کہ تمہارے والدین میرے دیکھے ہوئے سب سے بہادر اور مہربان لوگ تھے اور اگلی بار ہماری ملاقات ہوگورٹس میں ہوگی۔ اولیوینڈر بھی ہیری سے مخاطب ہو کر کہتے ہیں کہ مسٹر پوٹر مجھے توقع ہے کہ آپ سے بہت عظیم کام سرزد ہوں گے۔

سیریز میں ہیری پوٹر کا کردار ڈومینک میک لافلن، ہر مائنی گرینجر کا کردار اریبیلا اسٹینٹن اور رون ویزلی کا کردار ایلسٹیئر سٹاؤٹ ادا کر رہے ہیں۔ دیگر اہم کاسٹ میں جان لیتھگو بطور البس ڈمبلڈور، جینیٹ میک ٹیر بطور پروفیسر میک گوناگل، پاپا ایسیڈو بطور اسنیپ اور نک فروسٹ بطور ہیگرڈ شامل ہیں۔

جے کے رولنگ کی مشہور کتابوں پر مبنی اس سیریز کو فرانسیسکا گارڈنر نے تحریر کیا ہے جبکہ ہدایت کاری کے فرائض مارک مائیلوڈ نے انجام دیے ہیں۔ یہ سیریز برطانیہ، آئرلینڈ، جرمنی اور اٹلی سمیت دنیا کے متعدد ممالک میں دیکھی جا سکے گی۔