میری ٹائم ایکٹ پر وزارتِ خزانہ کے تحفظات، نظرِ ثانی شدہ مسودہ طلب

وزارت خزانہ نے پاکستان میری ٹائم اینڈ پورٹ اتھارٹی ایکٹ 2025 کے مسودے پر شدید تحفظات کا اظہار کرتے ہوئے اسے موجودہ شکل میں مسترد کر دیا ہے۔ حکومتی ذرائع کے مطابق وزارت خزانہ نے وزارت بحری امور کو ہدایت کی ہے کہ بین الاقوامی مالیاتی فنڈ کے ساتھ کیے گئے وعدوں اور مالیاتی تقاضوں کو مدنظر رکھتے ہوئے مسودے میں بنیادی تبدیلیاں کی جائیں۔

وزارت خزانہ کا موقف ہے کہ مجوزہ قانون سازی میں کئی خامیاں موجود ہیں جو عالمی معیارات سے ہم آہنگ نہیں۔ سب سے بڑا اعتراض اتھارٹی کے متضاد کردار پر ہے جہاں ایک ہی ادارہ ریگولیٹر اور آپریٹر دونوں کی ذمہ داریاں سنبھالے گا۔ وزارت نے اسے مفادات کا ٹکراؤ قرار دیتے ہوئے تجویز دی ہے کہ اسٹیٹ اونڈ انٹرپرائزز ایکٹ 2023 کے تحت پورٹ آپریشنز کے لیے ایک الگ ادارہ قائم کیا جائے۔

مسودے میں موجود شقیں پاکستان نیشنل شپنگ کارپوریشن، پورٹ قاسم اتھارٹی، کراچی پورٹ ٹرسٹ اور گوادر پورٹ اتھارٹی کی خود مختاری کو متاثر کر سکتی ہیں، جس سے آئی ایم ایف کے ساتھ طے پانے والے اصلاحاتی اہداف متاثر ہونے کا خدشہ ہے۔ وزارت نے کارپوریٹ گورننس کی بہتری کے لیے چیئرمین اور چیف ایگزیکٹو آفیسر کے عہدوں کو الگ کرنے اور بورڈ کی تشکیل میں شفافیت لانے کا مطالبہ بھی کیا ہے۔

مالیاتی نظم و ضبط کو یقینی بنانے کے لیے وزارت خزانہ نے ہدایت کی ہے کہ اتھارٹی کے اضافی فنڈز وفاقی خزانے میں جمع کرائے جائیں اور تمام ادائیگیاں پری آڈٹ کے عمل سے مشروط ہوں۔ اس کے علاوہ پالیسی سازی کے کلیدی اختیارات بورڈ کے بجائے وفاقی حکومت کے پاس ہونے چاہئیں تاکہ آئینی و قانونی پیچیدگیوں سے بچا جا سکے۔

ان اعتراضات کے بعد مجوزہ ایکٹ کی منظوری میں تاخیر متوقع ہے۔ ماہرین کا کہنا ہے کہ اگر ان ترامیم کو شامل نہ کیا گیا تو پاکستان کو آئی ایم ایف کے پروگرام کے تحت سنگین اعتراضات کا سامنا کرنا پڑ سکتا ہے۔ اب وزارت بحری امور کو تمام قانونی تقاضے پورے کرنے کے بعد نظرثانی شدہ مسودہ دوبارہ منظوری کے لیے پیش کرنا ہوگا۔