ایران کا دبئی میں یوکرین سے منسلک ڈرون مخالف گودام پر حملے کا دعویٰ

ایران نے دبئی میں ایک گودام کو نشانہ بنانے کا دعویٰ کیا ہے جس کے بارے میں تہران کا کہنا ہے کہ وہاں یوکرین سے منسلک اینٹی ڈرون سسٹمز ذخیرہ کیے گئے تھے۔ ایرانی پاسداران انقلاب کے ترجمان کے مطابق یہ کارروائی فضائی اور بحری افواج کے مشترکہ آپریشن کے تحت کی گئی جس کا مقصد امریکی فوجی آپریشنز میں معاونت کرنے والے تنصیبات کو تباہ کرنا تھا۔

ایرانی سرکاری میڈیا کے مطابق اس حملے میں دبئی میں موجود امریکی کمانڈروں اور اہلکاروں کے ٹھکانوں کو بھی نشانہ بنایا گیا جس کے نتیجے میں بھاری جانی نقصان کا دعویٰ کیا گیا ہے۔ ترجمان نے مزید کہا کہ حملے کے وقت گودام میں اکیس یوکرینی اہلکار موجود تھے جن کی ہلاکت کا خدشہ ظاہر کیا گیا ہے تاہم ان اطلاعات کی تاحال آزادانہ تصدیق نہیں ہو سکی ہے۔ متحدہ عرب امارات کے حکام کی جانب سے اس واقعے پر فی الحال کوئی باضابطہ بیان سامنے نہیں آیا ہے۔

یہ پیش رفت ایسے وقت میں ہوئی ہے جب یوکرین کے صدر ولادیمیر زیلنسکی متحدہ عرب امارات کے دورے پر ہیں۔ ہفتے کے روز ابوظہبی میں صدر شیخ محمد بن زاید النہیان کے ساتھ ملاقات کے دوران دونوں رہنماؤں نے دوطرفہ تعاون کو فروغ دینے پر اتفاق کیا۔ یوکرینی بیان کے مطابق ملاقات میں سیکیورٹی امور اور ایرانی ڈرون خطرات سے نمٹنے کے لیے یوکرینی ماہرین کی معاونت پر تبادلہ خیال کیا گیا۔

ملاقات میں آبنائے ہرمز کی کشیدہ صورتحال اور عالمی منڈیوں پر اس کے ممکنہ اثرات کا بھی جائزہ لیا گیا۔ دونوں ممالک نے دفاعی اور سیکیورٹی شعبوں میں تعاون کو وسیع کرنے کا عزم ظاہر کیا ہے۔ یہ پیش رفت سعودی عرب کے ساتھ یوکرین کے حالیہ دفاعی معاہدے کے بعد سامنے آئی ہے۔

تجزیہ کاروں کا کہنا ہے کہ اگر ایران کا یہ دعویٰ درست ثابت ہوتا ہے تو یہ خطے میں تناؤ میں خطرناک اضافے کا باعث بن سکتا ہے اور خلیجی خطے میں اہم تنصیبات کی سیکیورٹی کے حوالے سے سنگین خدشات پیدا ہو سکتے ہیں۔