تہران یونیورسٹی پر حملے کے بعد ایران کی خطے میں امریکی تعلیمی اداروں کو دھمکی

تہران میں یونیورسٹی آف سائنس اینڈ ٹیکنالوجی پر حملے کے بعد ایران کے پاسداران انقلاب نے خطے میں موجود امریکی جامعات کو نشانہ بنانے کی دھمکی دی ہے۔ پاسداران انقلاب سے منسلک فارس نیوز ایجنسی کے مطابق ایران نے مطالبہ کیا ہے کہ واشنگٹن پیر 30 مارچ کی دوپہر تک ان بمباریوں کی سرکاری سطح پر مذمت کرے۔

ایران کی جانب سے جاری بیان میں کہا گیا ہے کہ امریکی اور اسرائیلی حملوں میں ایران کی دو یونیورسٹیاں تباہ ہو چکی ہیں، لہذا اگر مطالبات پورے نہ ہوئے تو خطے میں موجود امریکی جامعات کو نشانہ بنایا جا سکتا ہے۔ بیان میں تنبیہ کی گئی ہے کہ ان تعلیمی اداروں کے ملازمین، اساتذہ، طلبہ اور ارد گرد کے رہائشی کیمپس سے کم از کم ایک کلومیٹر دور رہیں۔

خطے میں کئی امریکی تعلیمی ادارے قائم ہیں جن میں قطر میں ٹیکساس اے اینڈ ایم یونیورسٹی اور متحدہ عرب امارات میں نیویارک یونیورسٹی شامل ہیں۔ نیویارک یونیورسٹی ابوظہبی کے اسی فیصد طلبہ بین الاقوامی ہیں جن کا تعلق پاکستان، بھارت، چین، جنوبی کوریا، مصر اور اردن سے ہے۔

دریں اثنا امریکی صدر ڈونلڈ ٹرمپ نے دھمکی دی ہے کہ اگر ایران نے آبنائے ہرمز نہ کھولی تو اس کے پاور اسٹیشنز اور توانائی کے مراکز کو نشانہ بنایا جائے گا۔ تاہم ٹرمپ نے ایران کو جواب دینے کے لیے مزید دس دن کی مہلت دی ہے۔ دوسری جانب اسرائیلی حملوں نے ایران کے جوہری بنیادی ڈھانچے کو بھی ہدف بنایا ہے جس کے بعد روس نے بوشہر نیوکلیئر پاور پلانٹ سے اپنا عملہ واپس بلا لیا ہے۔

ایرانی صدر پزشکیان نے واضح کیا ہے کہ اگر ایران کے انفراسٹرکچر یا معاشی مراکز کو نشانہ بنایا گیا تو تہران بھرپور جوابی کارروائی کرے گا۔ اس کشیدگی کے دوران کویت، متحدہ عرب امارات اور عمان کے مختلف علاقوں میں ایرانی حملوں کی اطلاعات موصول ہوئی ہیں۔ علاوہ ازیں یروشلم کے قریب اسرائیلی گاؤں اشٹاول پر بھی ایرانی فضائی حملے کے نتیجے میں سات افراد زخمی ہوئے جنہیں ہسپتال منتقل کر دیا گیا ہے۔