خلیجی ممالک کا آبنائے ہرمز کے تحفظ کے لیے اقوام متحدہ سے طاقت کے استعمال کا مطالبہ

خلیج تعاون کونسل کے سیکریٹری جنرل جاسم البدیوی نے اقوام متحدہ کی سلامتی کونسل سے مطالبہ کیا ہے کہ وہ آبنائے ہرمز کو ایرانی حملوں سے محفوظ بنانے کے لیے طاقت کے استعمال کی اجازت دے۔ نیویارک میں سلامتی کونسل کے اجلاس سے خطاب کرتے ہوئے انہوں نے کہا کہ ایران نے اس اہم تجارتی راستے کو بند کر کے عالمی ایندھن کی سپلائی اور معیشت کو شدید خطرے میں ڈال دیا ہے۔

جاسم البدیوی کے مطابق ایران نے تجارتی جہازوں اور آئل ٹینکرز کی نقل و حمل روک دی ہے اور جہازوں کی آمدورفت کے لیے غیر معمولی شرائط عائد کر رکھی ہیں۔ خلیج تعاون کونسل کے سربراہ نے زور دیا کہ سلامتی کونسل اپنی ذمہ داری نبھائے اور بین الاقوامی جہاز رانی کو محفوظ بنانے کے لیے تمام ضروری اقدامات اٹھائے۔

بحرین کی جانب سے سلامتی کونسل میں ایک مسودہ قرارداد پیش کی گئی ہے جس میں رکن ممالک کو آبنائے ہرمز میں جہاز رانی کی آزادی یقینی بنانے کے لیے ہر ممکن اقدام کی اجازت دینے کی تجویز دی گئی ہے۔ تاہم پندرہ رکنی سلامتی کونسل اس معاملے پر تقسیم کا شکار ہے۔

سفارتی ذرائع کا کہنا ہے کہ روس، چین اور فرانس نے مسودے میں متعدد ترامیم کے باوجود اس پر سخت تحفظات کا اظہار کیا ہے۔ روسی نائب مندوب انا ایوستگنیوا کا کہنا ہے کہ سلامتی کونسل کو ایسا فیصلہ کرنا چاہیے جو یکطرفہ نہ ہو اور بحران کی بنیادی وجوہات کا احاطہ کرے۔ دوسری جانب فرانسیسی صدر ایمانوئل میکرون نے آبنائے کو کھولنے کے لیے کسی بھی فوجی آپریشن کو غیر حقیقت پسندانہ قرار دیا ہے۔

آبنائے ہرمز عالمی توانائی کی ترسیل کے لیے ایک اہم شریان ہے، جہاں سے دنیا بھر کا تقریباً بیس فیصد تیل اور مائع قدرتی گیس گزرتی ہے۔ اس اہم راستے کی بندش کے باعث عالمی سطح پر تیل، گیس اور کھاد کی سپلائی متاثر ہوئی ہے جس کے نتیجے میں توانائی کی قیمتوں میں نمایاں اضافہ دیکھنے میں آیا ہے۔ سلامتی کونسل میں اس قرارداد کا پانچواں مسودہ جمعرات کو رکن ممالک میں تقسیم کر دیا گیا ہے۔