تل ابیب میں موساد ہیڈکوارٹر پر حملے کی وائرل ویڈیو جعلی اور مصنوعی ذہانت سے تیار کردہ نکلی

تل ابیب میں اسرائیلی خفیہ ایجنسی موساد کے ہیڈکوارٹر پر ایرانی حملے اور دھماکے کا دعویٰ کرنے والی ویڈیو جعلی اور مصنوعی ذہانت یعنی اے آئی سے تیار کردہ ثابت ہوئی ہے۔ سوشل میڈیا پر وائرل ہونے والی اس ویڈیو میں ایک بلند و بالا عمارت سے دھوئیں کے بادل اٹھتے ہوئے دکھائے گئے تھے، جس کے بارے میں دعویٰ کیا گیا کہ یہ موساد کا مرکز ہے جسے ایرانی حملے میں تباہ کر دیا گیا ہے۔

مشرقِ وسطیٰ میں جاری کشیدگی کو 35 روز مکمل ہو چکے ہیں۔ حالیہ تنازع کا آغاز 28 فروری 2026 کو ہوا جب امریکہ اور اسرائیل نے ایران کے میزائل اور جوہری تنصیبات کو نشانہ بنایا۔ اس کے جواب میں ایران نے اسرائیل اور امریکی فوجی اڈوں پر جوابی حملے کیے، جس کے نتیجے میں 17 مارچ 2026 کو ایران کے قومی سلامتی کے سربراہ علی لاریجانی اور بسیج کمانڈر غلام رضا سلیمانی سمیت کئی اہم عہدیدار ہلاک ہوئے۔

ویڈیو کے حوالے سے گمراہ کن مہم کا آغاز 2 اپریل کو ہوا، جب ایکس پر ایک اکاؤنٹ نے یہ ویڈیو شیئر کرتے ہوئے دعویٰ کیا کہ موساد ہیڈکوارٹر مکمل طور پر تباہ ہو چکا ہے۔ اس پوسٹ کو 20 لاکھ سے زائد بار دیکھا گیا۔ بعد ازاں، ایران نواز اکاؤنٹس اور سرکاری خبر رساں ادارے تسنیم نیوز ایجنسی نے بھی اس ویڈیو کو حقیقت پر مبنی قرار دے کر شیئر کیا، جس سے سوشل میڈیا پر ایک طوفان کھڑا ہو گیا۔

تحقیقاتی ٹیم نے جب اس ویڈیو کا تکنیکی جائزہ لیا تو اس میں متعدد تضادات سامنے آئے۔ ویڈیو میں دھماکے کے باوجود قریب سے گزرتی گاڑیاں غیر متاثر دکھائی دیں، جبکہ دھوئیں کے بادلوں کی حرکت قدرتی قوانین کے برخلاف تھی۔ اے آئی ڈیٹیکشن ٹولز نے بھی اس ویڈیو کے 96 فیصد مصنوعی ہونے کی تصدیق کی۔

مزید برآں، ریورس امیج سرچ سے معلوم ہوا کہ یہی ویڈیو 4 مارچ اور یکم مارچ 2026 کو بھی مختلف تناظر میں سوشل میڈیا پر گردش کرتی رہی ہے، جس سے ثابت ہوتا ہے کہ یہ مواد پرانا اور من گھڑت ہے۔ کسی بھی مستند بین الاقوامی میڈیا ادارے نے موساد ہیڈکوارٹر پر حملے کی ایسی کسی کارروائی کی تصدیق نہیں کی ہے۔ آئی ویریفائی پاکستان کی جانب سے جاری کردہ اس فیکٹ چیک میں اس دعوے کو مکمل طور پر غلط قرار دیا گیا ہے۔