آبنائے ہرمز کے قریب امریکی فضائیہ کا دوسرا جنگی طیارہ گر کر تباہ

خلیج فارس کے خطے میں جمعہ کے روز امریکی فضائیہ کا ایک اور جنگی طیارہ گر کر تباہ ہو گیا تاہم خوش قسمتی سے پائلٹ کو بحفاظت نکال لیا گیا ہے۔ نیویارک ٹائمز نے امریکی حکام کے حوالے سے رپورٹ کیا ہے کہ حادثے کا شکار ہونے والا طیارہ اے ٹین وار تھوگ تھا جو آبنائے ہرمز کے قریب تباہ ہوا۔ یہ واقعہ اسی دوران پیش آیا جب ایران کے اوپر ایک امریکی ایف پندرہ ای لڑاکا طیارے کو گرائے جانے کی اطلاعات سامنے آئیں۔

نام ظاہر نہ کرنے کی شرط پر دو امریکی عہدیداروں نے تصدیق کی ہے کہ اے ٹین طیارے میں ایک پائلٹ سوار تھا جسے امریکی افواج نے کامیاب ریسکیو آپریشن کے بعد محفوظ مقام پر منتقل کر دیا ہے۔ تاہم امریکی حکام کی جانب سے طیارے کے گرنے کی حتمی وجہ، حالات اور جائے وقوعہ کے بارے میں تفصیلات فراہم نہیں کی گئیں۔

اے ٹین وار تھوگ کو زمینی فوج کو قریبی فضائی مدد فراہم کرنے کے لیے ڈیزائن کیا گیا ہے جو خاص طور پر بکتر بند گاڑیوں اور دشمن کی زمینی تنصیبات کو نشانہ بنانے کی صلاحیت رکھتا ہے۔

دوسری جانب الجزیرہ نے اپنی رپورٹ میں دعویٰ کیا ہے کہ ایرانی حکام نے آبنائے ہرمز کے جنوب میں سمندری حدود میں اے ٹین طیارے کو نشانہ بنانے کی ذمہ داری قبول کر لی ہے، تاہم اس دعوے کی آزادانہ ذرائع سے تاحال تصدیق نہیں ہو سکی ہے۔

خطے میں جاری شدید کشیدگی کے دوران یہ پیش رفت انتہائی اہم سمجھی جا رہی ہے۔ امریکی حکام پہلے ہی ایران کے اوپر ایک جدید ایف پندرہ ای لڑاکا طیارے کے نقصان کی تصدیق کر چکے ہیں جس میں عملے کے دو ارکان سوار تھے۔ ان میں سے ایک پائلٹ کو ریسکیو کر لیا گیا ہے جبکہ دوسرے کی تلاش کے لیے آپریشن تاحال جاری ہے۔