کرسٹیانو رونالڈو کی انجری کے بعد شاندار واپسی، دو گول کے ساتھ ٹیم کو فتح دلوا دی

سعودی پرو لیگ میں کرسٹیانو رونالڈو نے انجری کے بعد شاندار واپسی کرتے ہوئے دو گول اسکور کیے جس کی بدولت النصر نے نچلی پوزیشن پر موجود النجمہ کو دو کے مقابلے میں پانچ گول سے شکست دے دی۔ فروری سے انجری کے باعث ٹیم سے باہر رہنے والے پرتگالی اسٹار نے گزشتہ دو لیگ میچز اور پرتگال کی جانب سے میکسیکو اور امریکا کے خلاف دوستانہ میچز میں بھی شرکت نہیں کی تھی۔

میچ کے پہلے ہاف کے اختتام سے ایک منٹ قبل النجمہ کے راکان الطلحی نے گول کر کے ٹیم کو غیر متوقع برتری دلائی۔ تاہم النصر نے فوری ردعمل دیتے ہوئے پہلے ہاف کے انجری ٹائم میں عبداللہ الحمدان اور سادیو مانے کے گولز کی بدولت میچ پر گرفت مضبوط کر لی۔

دوسرے ہاف کے آغاز کے دو منٹ بعد ہی فلیپے کارڈوسو نے النجمہ کے لیے دوسرا گول کر کے مقابلہ برابر کر دیا، تاہم 56 ویں منٹ میں رونالڈو نے پنالٹی پر گول کر کے النصر کو دوبارہ برتری دلا دی۔ 41 سالہ رونالڈو نے 73 ویں منٹ میں اپنا دوسرا اور ٹیم کا چوتھا گول کیا جبکہ میچ کے آخری لمحات میں سادیو مانے نے ایک اور گول اسکور کر کے النصر کی فتح کو یقینی بنایا۔

اس کامیابی کے ساتھ ہی النصر نے لیگ میں اپنی مسلسل 13 ویں فتح حاصل کر لی ہے اور وہ 70 پوائنٹس کے ساتھ ٹیبل پر پہلے نمبر پر براجمان ہے۔ دوسرے نمبر پر موجود الہلال کی ٹیم النصر سے چھ پوائنٹس پیچھے ہے اور وہ ہفتے کے روز التعاون کے خلاف میدان میں اترے گی۔

جمعہ کو کھیلے گئے دیگر میچوں میں الاتحاد نے موسیٰ ڈیابی کے ریڈ کارڈ کے باوجود الحزم کو صفر کے مقابلے میں ایک گول سے شکست دی۔ الاتحاد کا واحد گول 72 ویں منٹ میں عبدالرحمن العبود نے اسکور کیا۔ اس جیت کے بعد الاتحاد 45 پوائنٹس کے ساتھ چھٹے نمبر پر پہنچ گیا ہے جبکہ الحزم 31 پوائنٹس کے ساتھ دسویں نمبر پر ہے۔

ایک اور مقابلے میں الخلود اور الخلیج کلب کے درمیان میچ دو دو گول سے برابر رہا۔ الخلود کے لیے گوگا اور عبدالعزیز العلوائی نے گول کیے جبکہ الخلیج کی جانب سے کونسٹانٹینو فورٹونس اور جارجوس ماسوراس نے اسکور کیا۔ اس نتیجے کے بعد الخلود لیگ ٹیبل پر 14 ویں اور الخلیج دسویں نمبر پر موجود ہے۔