بہاماس: کشتی سے گر کر امریکی خاتون لاپتہ، شوہر کا دعویٰ

بہاماس میں امریکی خاتون کی سمندر میں گمشدگی کا معاملہ سامنے آیا ہے، پولیس حکام لاپتہ خاتون کی تلاش کے لیے بڑے پیمانے پر ریسکیو آپریشن کر رہے ہیں۔ مقامی پولیس کے مطابق امریکی نژاد میاں بیوی ہفتے کی شام سات بج کر تیس منٹ پر ہوپ ٹاؤن سے ایلبو کے کی جانب آٹھ فٹ کی چھوٹی کشتی میں روانہ ہوئے تھے۔

خاتون کے شوہر نے حکام کو بیان دیا کہ کشتی کے سفر کے دوران ان کی اہلیہ حادثاتی طور پر سمندر میں گر گئیں۔ ان کا کہنا تھا کہ اہلیہ کے ساتھ کشتی کی چابیاں بھی پانی میں گر گئیں جس کے باعث انجن بند ہو گیا اور تیز لہریں خاتون کو بہا کر دور لے گئیں۔ شوہر نے بتایا کہ وہ کچھ دیر تک اہلیہ کو دیکھتے رہے لیکن پھر وہ نظروں سے اوجھل ہو گئیں۔

متاثرہ شخص نے مزید بتایا کہ وہ کشتی کو پیڈل کے ذریعے ساحل کی جانب لائے اور اتوار کی صبح چار بجے مارش ہاربر بوٹ یارڈ پہنچے۔ بوٹ یارڈ پہنچنے پر انہوں نے مقامی افراد کو واقعے سے آگاہ کیا، جس کے بعد پولیس کو اطلاع دی گئی۔ رائل بہاماس پولیس فورس، ڈیفنس فورس اور ہوپ ٹاؤن کے فائر فائٹرز مشترکہ طور پر تلاش جاری رکھے ہوئے ہیں۔

حکام نے تاحال جوڑے کی شناخت ظاہر نہیں کی ہے اور واقعے کی تحقیقات جاری ہیں۔ پولیس نے مقامی شہریوں سے اپیل کی ہے کہ اگر انہیں اس معاملے سے متعلق کوئی بھی معلومات حاصل ہوں تو وہ فوری طور پر قانون نافذ کرنے والے اداروں سے رابطہ کریں یا کرائم سٹاپر کے ذریعے گمنام اطلاع دیں۔

امریکی محکمہ خارجہ نے مارچ 2025 میں جاری کردہ ٹریول ایڈوائزری میں خبردار کیا تھا کہ بہاماس میں کشتی رانی کے امور کو درست طریقے سے ریگولیٹ نہیں کیا گیا ہے، جس کے باعث حادثات اور ہلاکتوں کے واقعات پیش آ چکے ہیں۔ ایڈوائزری میں سیاحوں کو ہدایت کی گئی ہے کہ وہ مقامی موسم اور سمندری الرٹس کو ہمیشہ مدنظر رکھیں۔