یہودی مخالف بیانات پر کینی ویسٹ کے برطانیہ میں داخلے پر پابندی عائد

برطانوی حکومت نے معروف امریکی ریپر کانیے ویسٹ، جنہیں اب ‘یے’ کے نام سے جانا جاتا ہے، کے برطانیہ میں داخلے پر پابندی عائد کر دی ہے۔ اس اقدام کے بعد لندن کے فنزبری پارک میں جولائی میں منعقد ہونے والا تین روزہ وائرلیس فیسٹیول منسوخ کر دیا گیا ہے۔

برطانوی ہوم آفس کے مطابق کانیے ویسٹ کا الیکٹرانک ٹریول اتھرائزیشن اس بنیاد پر منسوخ کیا گیا ہے کہ ان کی موجودگی عوامی مفاد کے لیے سازگار نہیں ہے۔ یہ فیصلہ ریپر کی جانب سے ماضی میں کیے گئے یہود مخالف بیانات کے تناظر میں سامنے آیا ہے۔

برطانوی وزیراعظم کیئر اسٹارمر نے سوشل میڈیا پر اپنے بیان میں کہا کہ کانیے ویسٹ کو فیسٹیول میں بطور ہیڈلائنر مدعو ہی نہیں کیا جانا چاہیے تھا۔ انہوں نے واضح کیا کہ موجودہ حکومت یہودی برادری کے ساتھ کھڑی ہے اور یہود دشمنی کے زہر کو شکست دینے کے لیے ہر ممکن اقدام اٹھائے گی۔

فیسٹیول کے منتظمین نے اعلان کیا ہے کہ ایونٹ منسوخ کر دیا گیا ہے اور ٹکٹ خریدنے والے افراد کو رقوم واپس کر دی جائیں گی۔ منتظمین کو گزشتہ کچھ عرصے سے اسپانسرز اور سیاستدانوں کی جانب سے شدید دباؤ کا سامنا تھا، جس کے باعث پیپسی اور راک سٹار انرجی جیسے بڑے اسپانسرز پہلے ہی فیسٹیول سے دستبردار ہو چکے تھے۔

اڑتالیس سالہ ریپر پر الزام ہے کہ انہوں نے ماضی میں ہٹلر کی تعریف کی اور متنازعہ لباس اور گیتوں کے ذریعے یہود مخالف جذبات کو ہوا دی۔ اگرچہ کانیے ویسٹ نے جنوری میں اپنے رویے پر معافی مانگی تھی اور دعویٰ کیا تھا کہ بائی پولر ڈس آرڈر کے باعث ان کا رویہ متاثر ہوا، تاہم برطانوی حکام اور یہودی تنظیموں نے اس معافی کو ناکافی قرار دیا ہے۔

کمیونٹی سیکیورٹی ٹرسٹ نے حکومتی فیصلے کو درست قرار دیتے ہوئے کہا کہ سماج میں یہود دشمنی کی کوئی جگہ نہیں ہے۔ دوسری جانب، فیسٹیول ریپبلک کے مینجنگ ڈائریکٹر میلون بین نے کہا کہ انہوں نے بکنگ سے قبل متعلقہ فریقین سے مشاورت کی تھی اور اس وقت کوئی تشویش ظاہر نہیں کی گئی تھی۔

کانیے ویسٹ کی جانب سے اس فیصلے پر فوری طور پر کوئی ردعمل سامنے نہیں آیا ہے۔ یہ ریپر گزشتہ ایک دہائی سے برطانیہ میں کوئی پرفارمنس نہیں کر سکے ہیں۔