برازیل: پولیس کتے ‘ہلک’ نے 48 ٹن منشیات پکڑ کر ریکارڈ قائم کر دیا

برازیل کے شہر ریو ڈی جنیرو میں پولیس نے ایک بڑی کارروائی کے دوران 48 ٹن چرس برآمد کر لی ہے، جو ملک کی تاریخ کی سب سے بڑی منشیات کی کھیپ ہے۔ یہ کامیابی کینائن یونٹ کے ایک تربیت یافتہ کتے ہلک کی بدولت ممکن ہوئی، جس نے معمول کی تلاشی کے دوران ایک ویران پانی کے ٹینک کے نیچے بنے خفیہ بنکر کی نشاندہی کی۔

کینائن آپریشنز بٹالین کے کمانڈر لیفٹیننٹ کرنل لوسیانو پیڈرو باربوسا کے مطابق یہ کارروائی کسی انٹیلیجنس اطلاع کے بغیر محض کتے کی سونگھنے کی صلاحیت کے نتیجے میں عمل میں آئی۔ انہوں نے بتایا کہ اس ضبطگی سے مجرمانہ گروہ کو تقریباً ایک کروڑ ڈالر کا مالی نقصان پہنچا ہے۔

کمپلیکس دا مارے کے علاقے میں ہونے والی اس کارروائی کے دوران پولیس کو منشیات ہٹانے میں پانچ گھنٹے لگے، جس کے لیے چار ٹرکوں کا استعمال کیا گیا۔ اس دوران جرائم پیشہ عناصر کی جانب سے فائرنگ بھی کی گئی جس کے جواب میں پولیس نے ایک مشتبہ مسلح شخص کو گرفتار کر لیا۔

منگل کے روز شروع ہونے والے اس آپریشن میں 250 اہلکاروں نے حصہ لیا۔ پولیس نے منشیات کے علاوہ پانچ رائفلیں، چار پستول اور 26 چوری شدہ گاڑیاں اور موٹر سائیکلیں بھی قبضے میں لی ہیں۔

برازیل میں اس سے قبل سب سے بڑی منشیات کی ضبطگی 2021 میں ہوئی تھی، جب ہائی وے پولیس نے ماتو گروسو دو سول میں 36 اعشاریہ 5 ٹن منشیات پکڑی تھی۔ سوشل میڈیا پر عوام نے اس کارروائی میں اہم کردار ادا کرنے والے کتے ہلک کی کارکردگی کو خوب سراہا ہے۔