دبئی کی جانب سے غیر ملکی پروازوں پر پابندی، بھارتی ایئر لائنز شدید متاثر

دبئی کی جانب سے ایران میں جاری کشیدگی کے پیش نظر غیر ملکی ایئر لائنز کی پروازوں کو محدود کرنے کے فیصلے سے بھارتی فضائی کمپنیوں کو شدید مالی نقصان کا سامنا ہے۔ دبئی ایئرپورٹس نے 31 مئی تک تمام غیر ملکی فضائی کمپنیوں کو یومیہ صرف ایک پرواز چلانے کی اجازت دی ہے جس پر بھارتی ایئر لائنز نے شدید تحفظات کا اظہار کیا ہے۔

فیڈریشن آف انڈین ایئر لائنز نے بھارتی حکومت کو لکھے گئے خط میں مطالبہ کیا ہے کہ دبئی حکام پر پابندیاں اٹھانے کے لیے دباؤ ڈالا جائے۔ فیڈریشن نے خبردار کیا ہے کہ اگر یہ پابندیاں برقرار رہیں تو بھارت کو چاہیے کہ وہ دبئی کی ایئر لائنز ایمریٹس اور فلائی دبئی کے خلاف جوابی اقدامات کرے۔

بھارتی فضائی کمپنیوں کا کہنا ہے کہ یہ پابندیاں صرف غیر ملکی ایئر لائنز پر لاگو ہیں جبکہ دبئی کی اپنی فضائی کمپنیاں معمول کے مطابق پروازیں جاری رکھے ہوئے ہیں جس سے مسابقتی میدان غیر ہموار ہو گیا ہے۔ انڈین ایئر لائنز پہلے ہی پاکستانی فضائی حدود کی بندش اور ایندھن کی بڑھتی ہوئی قیمتوں کے باعث مالی دباؤ کا شکار ہیں۔

دبئی ایئرپورٹس کے اعداد و شمار کے مطابق 2025 میں دبئی کے بین الاقوامی ایئرپورٹ سے سفر کرنے والے مسافروں میں بھارت کا حصہ سب سے زیادہ رہا ہے جس کی تعداد ایک کروڑ 19 لاکھ ہے۔ پابندیوں کے باعث ایئر انڈیا، انڈیگو اور سپائس جیٹ کی سیکڑوں پروازیں متاثر ہوں گی۔

انڈیگو نے اپنے بیان میں کہا ہے کہ دبئی کی پابندیوں کے باعث اس کے آپریشنز شدید محدود ہو کر رہ گئے ہیں اور کمپنی کی بڑی صلاحیت غیر استعمال شدہ پڑی ہے۔ دوسری جانب لفتھانسا، سنگاپور ایئر لائنز اور برٹش ایئر ویز جیسی بڑی بین الاقوامی ایئر لائنز نے 31 مئی تک دبئی کے لیے اپنی تمام پروازیں منسوخ کر دی ہیں اور وہ اب ایشیا اور یورپ کے درمیان براہ راست پروازوں پر توجہ مرکوز کر رہی ہیں۔

دبئی ایئرپورٹس اور دبئی میڈیا آفس کی جانب سے اس صورتحال پر تاحال کوئی باضابطہ ردعمل سامنے نہیں آیا ہے۔ فلائی دبئی کا کہنا ہے کہ ان کے پروازوں کے شیڈول متعلقہ حکام کی منظوری سے چل رہے ہیں۔