میکسیکو کے مغربی علاقے میں حکام نے کم از کم 11 افراد کی باقیات دریافت کی ہیں جنہیں خفیہ قبروں میں دفن کیا گیا تھا۔ مقامی پراسیکیوٹر آفس کے مطابق یہ قبریں ریاست جلیسکو کے علاقے گواڈالاجارا کے مضافات میں واقع ایک دیہی پلاٹ سے ملی ہیں۔
اس کے ساتھ ساتھ لاپتہ افراد کی ڈپٹی پراسیکیوٹر بلانکا ٹرجیلو نے ایک پریس کانفرنس کے دوران انکشاف کیا کہ قریبی علاقے تلاجومولکو میں ایک تعمیراتی مقام سے انسانی باقیات سے بھرے 12 تھیلے بھی برآمد ہوئے ہیں۔ حکام کا کہنا ہے کہ دونوں مقامات سے ملنے والی لاشوں کی حتمی تعداد کا تعین ابھی نہیں ہو سکا ہے اور ابتدائی جائزے کے مطابق یہ باقیات کافی پرانی معلوم ہوتی ہیں۔
جلیسکو ریاست میکسیکو میں لاپتہ افراد کے بحران سے سب سے زیادہ متاثرہ خطہ ہے جہاں منشیات فروخت کرنے والے طاقتور کارٹیلز سرگرم ہیں۔ سرکاری اعداد و شمار کے مطابق گزشتہ دو دہائیوں کے دوران میکسیکو میں ایک لاکھ 30 ہزار سے زائد افراد لاپتہ ہو چکے ہیں جبکہ صرف جلیسکو میں یہ تعداد 15 ہزار 900 سے تجاوز کر گئی ہے۔ ماہرین ان واقعات کا ذمہ دار جلیسکو نیو جنریشن کارٹیل کو ٹھہراتے ہیں جس پر الزام ہے کہ وہ جعلی ملازمتوں کا لالچ دے کر نوجوانوں کو بھرتی کرتا ہے اور انکار کرنے والوں کو تشدد کا نشانہ بنا کر قتل کر دیتا ہے۔
گواڈالاجارا شہر ان تین میکسیکن شہروں میں شامل ہے جہاں رواں موسم گرما میں فیفا مینز ورلڈ کپ کے میچز کھیلے جائیں گے۔ وفاقی حکومت نے ورلڈ کپ کے میزبان شہروں بشمول مونٹیری اور میکسیکو سٹی میں سیکیورٹی کو یقینی بنانے کے لیے ایک لاکھ کے قریب فوجی اہلکار تعینات کرنے کا اعلان کیا ہے۔
یاد رہے کہ فروری میں میکسیکو کی فوجی کارروائی کے دوران جلیسکو نیو جنریشن کارٹیل کے سربراہ نیمیسیو اوسیوگیرا عرف ایل مینچو کی ہلاکت کے بعد ملک میں تشدد کی لہر میں اضافہ ہوا تھا۔ اوسیوگیرا امریکہ کے مطلوب ترین منشیات فروشوں میں شمار ہوتا تھا جسے مارچ میں بھاری فوجی سیکیورٹی کے حصار میں ایک سنہری تابوت میں دفن کیا گیا تھا۔ اس سے قبل 2017 میں ویراکروز شہر کے مضافات سے بھی 250 سے زائد کھوپڑیاں برآمد ہوئی تھیں جو میکسیکو میں دریافت ہونے والی سب سے بڑی اجتماعی قبروں میں سے ایک تھی۔
صدر ڈونلڈ ٹرمپ کے بیجنگ کے دورے اور چینی صدر شی جن پنگ کے ساتھ…
اسلام آباد میں پاکستان تحریک انصاف کے بانی چیئرمین سے ملاقات کے لیے چھ رکنی…
اقوام متحدہ کے سابق ہتھیاروں کے معائنہ کار اور امریکی میرین کور کے انٹیلی جنس…
وزیراعظم شہباز شریف کی جانب سے گلگت بلتستان کے دورے کے دوران خطے میں چار…
کراچی میں پانی کی چوری کی روک تھام کے لیے قائم خصوصی تھانہ خود سنگین…
امریکی صدر ڈونلڈ ٹرمپ چین کے دورے پر پہنچ گئے ہیں، ان کے ہمراہ امریکہ…