نیتن یاہو کا اسپین پر اسرائیل کے خلاف سفارتی مہم چلانے کا الزام

اسرائیلی وزیراعظم بنجمن نیتن یاہو نے اسپین پر اسرائیل کے خلاف سفارتی مہم چلانے کا الزام عائد کرتے ہوئے میڈرڈ کو غزہ میں جنگ کے بعد استحکام کے لیے قائم امریکی زیرقیادت مرکز سے باہر نکال دیا ہے۔ دونوں ممالک کے درمیان تعلقات اس وقت سے شدید کشیدہ ہیں جب اسپین نے 2024 میں فلسطینی ریاست کو تسلیم کیا تھا جس کے بعد سے دونوں ملکوں نے اپنے سفیروں کو واپس بلا لیا ہے۔

نیتن یاہو نے ایک ویڈیو بیان میں کہا کہ انہوں نے کریات گیٹ میں قائم کوآرڈینیشن سینٹر سے ہسپانوی نمائندوں کو ہٹانے کی ہدایت کی ہے۔ ان کا کہنا تھا کہ اسپین نے بار بار اسرائیل کے خلاف کھڑے ہونے کا انتخاب کیا ہے اور جو ممالک دہشت گرد حکومتوں کا مقابلہ کرنے کے بجائے اسرائیل پر تنقید کرتے ہیں وہ خطے کے مستقبل کی تشکیل میں ہمارے شراکت دار نہیں ہو سکتے۔

کریات گیٹ میں قائم سول ملٹری کوآرڈینیشن سینٹر دس اکتوبر کو غزہ میں جنگ بندی کے بعد قائم کیا گیا تھا جس کا مقصد جنگ بندی کی نگرانی کرنا اور فلسطینی علاقے میں انسانی امداد کی فراہمی کو یقینی بنانا ہے۔ اس مرکز میں فرانس، برطانیہ اور متحدہ عرب امارات سمیت دیگر ممالک کے فوجی اور سفارتی حکام شامل ہیں جو سیکیورٹی اور انسانی امور پر کام کر رہے ہیں۔

اسرائیلی وزارت خارجہ نے جمعہ کے روز باضابطہ طور پر اسپین کو اس مرکز سے نکالنے کا اعلان کیا۔ وزیراعظم نیتن یاہو نے مزید کہا کہ اسرائیل اپنے خلاف تنقید کرنے والوں کے سامنے خاموش نہیں رہے گا اور وہ کسی بھی ملک کو اسرائیل کے خلاف سفارتی جنگ لڑنے کی اجازت نہیں دیں گے جس کی قیمت انہیں ادا کرنی پڑے گی۔

ہسپانوی وزیراعظم پیڈرو سانچیز غزہ میں اسرائیلی کارروائیوں کے سخت ناقد رہے ہیں اور انہوں نے 28 فروری سے ایران کے خلاف شروع ہونے والی امریکی اسرائیلی جنگ کی بھی مخالفت کی تھی۔ اسرائیلی وزیر خارجہ گیڈون سار بھی اسپین پر تنقید کر چکے ہیں اور ان کا دعویٰ ہے کہ ہسپانوی حکومت ایران کے خلاف حملوں کی مخالفت کر کے ظالموں کا ساتھ دے رہی ہے اور فلسطینی ریاست کو تسلیم کر کے نسل کشی اور جنگی جرائم میں معاونت کر رہی ہے۔

اسپین اور اسرائیل کے درمیان سفارتی تعلقات کا آغاز 1986 میں ہوا تھا۔ اس سے قبل جنرل فرانسسکو فرانکو کے دور حکومت میں اسپین نے اسرائیل کو تسلیم کرنے سے گریز کیا تھا اور عرب ممالک کے ساتھ قریبی سفارتی تعلقات برقرار رکھے تھے۔