وزیراعظم شہباز شریف کا جون میں دورہ روس متوقع، ولادیمیر پیوٹن سے ملاقات کا امکان

وزیر اعظم شہباز شریف کا جون میں دورہ روس متوقع ہے جس کے دوران ان کی روسی صدر ولادیمیر پیوٹن سے اہم ملاقات کا امکان ہے۔ اس دورے کی تیاریوں اور تاریخوں کو حتمی شکل دینے پر کام جاری ہے۔

پاکستان کے سفیر برائے روس فیصل نیاز ترمذی نے ایک انٹرویو میں بتایا کہ وزیر اعظم اس دورے کو ایک تاریخی موقع سمجھتے ہیں اور وہ عالمی سطح پر بااثر رہنما تصور کیے جانے والے روسی صدر سے ملاقات کے لیے پرعزم ہیں۔

مشرق وسطیٰ کی کشیدہ صورتحال پر بات کرتے ہوئے سفیر نے انکشاف کیا کہ پاکستان نے روس سے مطالبہ کیا ہے کہ وہ اسرائیل پر اپنا اثر و رسوخ استعمال کرے تاکہ ایران کے ساتھ بڑھتی ہوئی کشیدگی کو کم کیا جا سکے۔

سفیر کا کہنا ہے کہ اسلام آباد اور ماسکو کے درمیان سفارتی رابطے مسلسل فعال ہیں اور پاکستان نے واضح کیا ہے کہ ایران کے ساتھ جنگ اسرائیل کے لیے نقصان دہ ثابت ہو سکتی ہے۔

فیصل نیاز ترمذی نے اس عزم کا اعادہ کیا کہ پاکستان خطے میں امن و استحکام کے فروغ اور عالمی سفارتی کوششوں میں اپنا فعال کردار ادا کرنے کے لیے پرعزم ہے۔