میکرون کا ایرانی صدر پر اسلام آباد مذاکرات سے خطے میں کشیدگی کم کرنے پر زور

فرانسیسی صدر ایمانوئیل میکرون نے ایرانی صدر مسعود پزشکیان پر زور دیا ہے کہ وہ اسلام آباد میں جاری مذاکرات کو خطے میں دیرپا کشیدگی کے خاتمے کے لیے استعمال کریں۔ سوشل میڈیا پلیٹ فارم ایکس پر اپنے بیان میں میکرون نے کہا کہ انہوں نے ایرانی صدر سے مطالبہ کیا ہے کہ وہ اسلام آباد میں شروع ہونے والی بات چیت کے موقع کو غنیمت جانیں تاکہ خطے میں سکیورٹی کی مضبوط ضمانتوں کے ساتھ ایک مستحکم معاہدے کی راہ ہموار کی جا سکے۔

فرانسیسی صدر نے آبنائے ہرمز میں جہاز رانی کی آزادی اور تحفظ کو جلد از جلد بحال کرنے کی ضرورت پر زور دیا اور اسے علاقائی استحکام کے لیے ناگزیر قرار دیا۔ ان کا کہنا تھا کہ طویل المدتی سکیورٹی کے لیے تمام متعلقہ فریقین کی شمولیت کے ساتھ ایک جامع اور پائیدار معاہدہ انتہائی اہم ہے۔

لبنان کی صورتحال پر بات کرتے ہوئے میکرون نے جنگ بندی کی مکمل پاسداری پر زور دیا۔ انہوں نے بیروت کی حمایت کا اعادہ کرتے ہوئے کہا کہ فرانس لبنانی حکام کے اقدامات کے ساتھ کھڑا ہے۔ ان کا مزید کہنا تھا کہ صرف لبنانی حکام کو ہی ریاستی خودمختاری استعمال کرنے اور ملک کا مستقبل طے کرنے کا آئینی اور قانونی حق حاصل ہے۔

دوسری جانب ایرانی صدر مسعود پزشکیان نے کہا ہے کہ پاکستان میں موجود اعلیٰ سطحی وفد مذاکرات کے دوران ایران کے مفادات کے تحفظ کے لیے پرعزم ہے۔ انہوں نے سماجی رابطے کی ویب سائٹ پر اپنے پیغام میں واضح کیا کہ مذاکرات کے نتائج کچھ بھی ہوں، ایرانی حکومت اپنے عوام کے ساتھ کھڑی رہے گی۔

یہ بیانات ایک ایسے وقت میں سامنے آئے ہیں جب پاکستان کی سفارتی کوششوں سے اسلام آباد میں امریکہ اور ایران کے درمیان اہم مذاکرات جاری ہیں۔ یہ بات چیت ایک دہائی سے زائد عرصے میں دونوں ممالک کے درمیان پہلا براہ راست رابطہ ہے، جسے 1979 کے ایرانی انقلاب کے بعد سب سے اہم سفارتی پیش رفت قرار دیا جا رہا ہے۔ عالمی برادری کی نظریں ان مذاکرات کے نتائج پر مرکوز ہیں جنہیں خطے میں امن و استحکام کے لیے انتہائی کلیدی حیثیت حاصل ہے۔