نیویارک کے میئر زوہان ممدانی کے سو روزہ دور کا اختتام، سوشلسٹ ایجنڈے کے فروغ کا اعلان

نیویارک کے میئر زہران ممدانی نے اپنے عہدے کے سو دن مکمل ہونے پر کوئینز میں ایک بڑے جلسے سے خطاب کرتے ہوئے اپنے سوشلسٹ ایجنڈے کے عزم کا اعادہ کیا ہے۔ چونتیس سالہ میئر کے ہمراہ ان کے قریبی اتحادی اور بائیں بازو کے معروف رہنما چوراسی سالہ برنی سینڈرز بھی موجود تھے۔

جلسے سے خطاب کرتے ہوئے زہران ممدانی نے کہا کہ کچھ لوگ سوشلزم کو ایک گالی یا شرمندگی کی علامت سمجھتے ہیں تاہم وہ اس نظریے سے شرمندہ نہیں ہیں۔ ان کا کہنا تھا کہ حکومت کا مقصد صرف چند مخصوص لوگوں کے بجائے عوام کی اکثریت کے حقوق کے لیے لڑنا ہے۔

میئر نے اپنی کارکردگی کا دفاع کرتے ہوئے بتایا کہ یکم جنوری سے اب تک شہر کی سڑکوں سے ایک لاکھ سے زائد گڑھے بھرے جا چکے ہیں۔ انہوں نے سوال اٹھایا کہ اگر حکومت چھوٹے کام کرنے کی صلاحیت نہیں رکھتی تو عوام اس پر بڑے فیصلوں کے لیے کیسے اعتماد کر سکتے ہیں۔

ممدانی نے اپنے انتخابی وعدوں پر پیش رفت کا ذکر کرتے ہوئے کہا کہ شہر کے زیر انتظام کریانہ اسٹورز کا قیام اگلے سال سے شروع ہو جائے گا جبکہ بچوں کے لیے مفت نگہداشت کی سہولیات بھی فراہم کی جائیں گی۔ اس کے علاوہ کرایوں میں اضافے کو روکنے کے لیے سٹی کمیٹیوں میں ردوبدل کیا گیا ہے تاہم بسوں میں مفت سفر کی سہولت پر ریاستی حکام کے ساتھ بات چیت جاری ہے۔

رواں ہفتے جاری ہونے والے دو مختلف جائزوں کے مطابق میئر کی مقبولیت کی شرح اڑتالیس فیصد جبکہ ووٹرز میں تینتالیس فیصد ہے۔ ایمرسن کالج کی رپورٹ میں چونتیس فیصد افراد نے بچوں کی نگہداشت اور انچاس فیصد نے رہائشی اخراجات کے حوالے سے ان کے اقدامات کو سراہا ہے۔ تاہم سروے میں یہ بات بھی سامنے آئی ہے کہ اٹھاون فیصد سیاہ فام اور اڑسٹھ فیصد ہسپانوی نژاد ووٹرز شہر کے حالات سے مطمئن نہیں ہیں۔

انتخابی مہم کے دوران ڈونلڈ ٹرمپ پر کڑی تنقید کرنے کے باوجود زہران ممدانی نے صدر کے ساتھ خوشگوار تعلقات قائم کیے ہیں اور حالیہ مہینوں میں دو بار وائٹ ہاؤس کا دورہ بھی کیا ہے۔ مارسٹ پول کے مطابق انسٹھ فیصد نیویارک کے رہائشیوں کا ماننا ہے کہ میئر نے ٹرمپ کے ساتھ تعلقات میں درست توازن برقرار رکھا ہوا ہے۔