ایران تیل کی برآمدات بند ہونے کے باوجود دو ماہ تک معاشی دباؤ برداشت کر سکتا ہے، تجزیہ کار

تیرہ اپریل سے امریکی جانب سے ایرانی بندرگاہوں پر جہاز رانی روکنے کے بعد ماہرین نے خبردار کیا ہے کہ ایران زیادہ سے زیادہ دو ماہ تک تیل کی برآمدات مکمل بند ہونے کی صورت میں پیداوار جاری رکھ سکتا ہے جس کے بعد اسے پیداوار میں کمی پر مجبور ہونا پڑے گا۔ اس ناکہ بندی کے باعث یومیہ تقریباً بیس لاکھ بیرل ایرانی خام تیل چین تک پہنچنے سے رک سکتا ہے جو اس کا سب سے بڑا خریدار ہے۔

ماہرین کا کہنا ہے کہ اگر ایران کو پیداوار بند کرنی پڑی تو اس سے عالمی منڈی میں پہلے سے جاری بارہ ملین بیرل یومیہ کی سپلائی میں تعطل مزید سنگین ہو جائے گا جس کے نتیجے میں عالمی سطح پر تیل کی قیمتوں میں مزید اضافہ متوقع ہے۔ برآمدات رکنے کی صورت میں ایران کے پاس خام تیل کو خشکی پر قائم اسٹوریج ٹینکوں میں منتقل کرنے کے سوا کوئی چارہ نہیں بچے گا۔

کنسلٹنسی فرم ایف جی ای نیکسٹانٹ ای سی اے کے مطابق ایران کے پاس نو کروڑ بیرل تک خام تیل ذخیرہ کرنے کی گنجائش موجود ہے۔ رپورٹ میں کہا گیا ہے کہ ایران دو ماہ تک اپنی موجودہ پینتیس لاکھ بیرل یومیہ کی پیداوار کو برقرار رکھ سکتا ہے اور اگر پانچ لاکھ بیرل یومیہ کی کٹوتی کی جائے تو یہ دورانیہ تین ماہ تک بڑھایا جا سکتا ہے۔ ایران کی مقامی ریفائنریز یومیہ بیس لاکھ بیرل تیل صاف کرتی ہیں۔

دوسری جانب انرجی اسپیکٹس نامی ادارے کا تخمینہ ہے کہ ایران کی زمینی اسٹوریج کی صلاحیت اس سے کہیں کم یعنی تین کروڑ بیرل کے لگ بھگ ہے۔ ادارے کے شریک بانی رچرڈ برونز کے مطابق اگر ناکہ بندی مئی تک جاری رہتی ہے تو ایران کو اپنی پیداوار میں نمایاں کمی کرنا ہوگی۔ انہوں نے مزید کہا کہ ایران اپنے موجودہ آئل ٹینکرز کو تیرتے ہوئے ذخیرہ گاہوں کے طور پر استعمال کر کے پیداوار میں کٹوتی کو کچھ عرصے کے لیے مؤخر کر سکتا ہے۔

امریکی حکام کے مطابق ناکہ بندی کے بعد سے اب تک آٹھ ایرانی نژاد آئل ٹینکرز کو روکا جا چکا ہے۔ منگل کے روز ایک امریکی ڈسٹرائر نے چاہ بہار بندرگاہ سے نکلنے والے دو ٹینکرز کو واپس موڑ دیا تھا۔ امریکی فوج نے تصدیق کی ہے کہ پابندیوں کی زد میں آنے والے چینی ملکیتی ٹینکر رچ سٹاری سمیت متعدد جہازوں کو آبنائے ہرمز سے واپس جانے پر مجبور کیا گیا ہے۔ اس صورتحال پر ایرانی حکام کی جانب سے فوری طور پر کوئی مؤقف سامنے نہیں آیا ہے۔