پوپ لیو کا کیمرون میں عالمی رہنماؤں پر تنقید، دنیا کو ظالموں کے قبضے میں قرار دے دیا

پوپ لیو نے کیمرون کے دورے کے دوران عالمی رہنماؤں پر کڑی تنقید کرتے ہوئے کہا ہے کہ دنیا بھر کے حکمران جنگوں پر اربوں ڈالر خرچ کر رہے ہیں۔ انہوں نے اپنے غیر معمولی سخت بیان میں کہا کہ دنیا کو مٹھی بھر ظالموں نے تباہی کے دہانے پر لا کھڑا کیا ہے۔

یہ بیان ایسے وقت میں سامنے آیا ہے جب امریکی صدر ڈونلڈ ٹرمپ کی جانب سے سوشل میڈیا پر پوپ کے خلاف تنقید کا سلسلہ جاری ہے۔ پوپ لیو، جو پہلے امریکی پوپ ہیں، نے ان رہنماؤں کو بھی شدید تنقید کا نشانہ بنایا جو جنگوں کو جائز قرار دینے کے لیے مذہبی زبان کا سہارا لیتے ہیں۔

کیمرون کے انگریزی بولنے والے علاقوں کے سب سے بڑے شہر میں ایک اجلاس سے خطاب کرتے ہوئے پوپ نے مطالبہ کیا کہ عالمی سطح پر پالیسیوں میں فیصلہ کن تبدیلی لائی جائے۔ واضح رہے کہ مذکورہ خطے میں گزشتہ ایک دہائی سے جاری تنازع کے نتیجے میں ہزاروں افراد اپنی جانوں سے ہاتھ دھو چکے ہیں۔