امریکی پابندیوں کو نظر انداز کرتے ہوئے دو آئل ٹینکرز ایران پہنچ گئے

واشنگٹن کی جانب سے ایرانی بندرگاہوں پر عائد کردہ ناکہ بندی کے باوجود دو بڑے آئل ٹینکرز خلیج فارس میں داخل ہو گئے ہیں۔ خبر رساں اداروں اور میری ٹائم ٹریکنگ کے اعداد و شمار کے مطابق یہ جہاز بظاہر ایران کی جانب گامزن ہیں۔

امریکی فوج نے بدھ کے روز دعویٰ کیا تھا کہ ایرانی بندرگاہوں کی جانب جانے والے یا وہاں سے آنے والے جہازوں کی ناکہ بندی کو 48 گھنٹوں کے دوران مکمل طور پر نافذ کر دیا گیا ہے۔ تاہم اس ناکہ بندی کے باوجود گزشتہ دو روز کے دوران چند جہازوں نے آبنائے ہرمز کو عبور کیا ہے۔

میری ٹائم ٹریکنگ فرم کیپلر کے اعداد و شمار کے مطابق آر ایچ این اور ایلیسیا نامی دو بڑے کروڈ کیریئرز پیر کو ناکہ بندی کے نفاذ کے بعد آبنائے ہرمز سے گزر کر ایرانی ساحل کے قریب پہنچ چکے ہیں۔ ان سپر ٹینکرز نے پہلے اپنی منزل عراق ظاہر کی تھی لیکن آبنائے عبور کرتے وقت اپنی منزل کو فار آرڈر میں تبدیل کر دیا۔

امریکی سینٹرل کمانڈ سینٹکام کا کہنا ہے کہ ناکہ بندی کے لیے دس ہزار سے زائد اہلکار تعینات کیے گئے ہیں جو ایرانی بندرگاہوں اور ساحلی علاقوں میں آنے جانے والے تمام ممالک کے جہازوں کے خلاف کارروائی کر رہے ہیں۔

اعداد و شمار سے یہ بھی معلوم ہوا ہے کہ ایگیوس فانورس ون نامی ایک اور بڑا کروڈ کیریئر اور جی سمر نامی مائع پیٹرولیم گیس کا ٹینکر بھی ناکہ بندی کے دوران آبنائے عبور کرنے کے بعد خلیج میں داخل ہوئے اور انہوں نے اپنی منزل عراق بتائی ہے۔

اس کے علاوہ زائنر ٹو نامی کنٹینر شپ اور نیشات نامی خالی کارگو جہاز بھی بدھ اور جمعرات کے روز آبنائے سے گزرے ہیں اور ٹریکنگ پلیٹ فارم میرین ٹریفک کے مطابق انہیں ایرانی بندرگاہ بندر عباس کے قریب دیکھا گیا ہے۔