امریکہ اور ایران کے درمیان مذاکرات کا اگلا دور ممکنہ طور پر ویک اینڈ پر ہوگا، ٹرمپ

امریکی صدر ڈونلڈ ٹرمپ نے اعلان کیا ہے کہ ایران کے ساتھ امن معاہدے کے لیے مذاکرات کا اگلا دور ممکنہ طور پر رواں ہفتے کے اختتام پر منعقد ہوگا۔ وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ اگر یہ معاہدہ طے پا جاتا ہے تو وہ اسلام آباد کا دورہ کر سکتے ہیں۔

صدر ٹرمپ نے ثالثی کی کوششوں میں پاکستان کے کردار کو سراہتے ہوئے کہا کہ پاکستان کا کردار انتہائی شاندار رہا ہے۔ انہوں نے وزیراعظم شہباز شریف اور چیف آف آرمی اسٹاف فیلڈ مارشل عاصم منیر کی تعریف کرتے ہوئے کہا کہ اگر معاہدہ طے پا گیا تو وہ اسلام آباد جا سکتے ہیں کیونکہ وزیراعظم اور فیلڈ مارشل نے بہت بہترین کام کیا ہے۔

امریکی صدر نے انکشاف کیا کہ ایران اپنے افزودہ یورینیم کا ذخیرہ حوالے کرنے پر رضامند ہو گیا ہے۔ انہوں نے اسے نیوکلیئر ڈسٹ کا نام دیتے ہوئے کہا کہ دونوں ممالک چھ ہفتوں سے جاری تنازع کے خاتمے کے لیے ایک امن معاہدے کے قریب ہیں۔

ڈونلڈ ٹرمپ کا کہنا تھا کہ معاہدے کا امکان بہت روشن ہے تاہم انہوں نے خبردار کیا کہ اگر کوئی سمجھوتہ نہ ہوا تو لڑائی دوبارہ شروع ہو سکتی ہے۔ انہوں نے مزید کہا کہ انہیں جنگ بندی میں توسیع کی ضرورت محسوس نہیں ہوتی کیونکہ ایران اب ان اقدامات کے لیے تیار ہے جن سے وہ پہلے گریزاں تھا۔

لبنان اور اسرائیل کے درمیان جنگ بندی کے حوالے سے ایک سوال کے جواب میں امریکی صدر نے کہا کہ انہیں امید ہے کہ جلد ہی کوئی معاہدہ طے پا جائے گا جس میں حزب اللہ بھی شامل ہوگی۔

صدر ٹرمپ نے کہا کہ چوالیس برسوں میں پہلی بار لبنان اور اسرائیل کے رہنماؤں کے درمیان ملاقات متوقع ہے اور اس بات کا قوی امکان ہے کہ یہ تاریخی ملاقات آئندہ ایک یا دو ہفتوں کے دوران وائٹ ہاؤس میں منعقد ہوگی۔