لبنان میں یسوع مسیح کے مجسمے کی بے حرمتی، نیتن یاہو کا سخت تادیبی کارروائی کا اعلان

اسرائیلی وزیراعظم بنجمن نیتن یاہو نے جنوبی لبنان میں ایک اسرائیلی فوجی کی جانب سے حضرت عیسیٰ علیہ السلام کے مجسمے کو ہتھوڑے سے توڑنے کی تصویر پر شدید صدمے اور دکھ کا اظہار کیا ہے۔

سماجی رابطے کی ویب سائٹ ایکس پر اپنے بیان میں نیتن یاہو نے اس واقعے کی سخت ترین الفاظ میں مذمت کرتے ہوئے کہا کہ ملوث فوجی کے خلاف سخت تادیبی کارروائی کی جائے گی۔ انہوں نے لبنان اور دنیا بھر کے مسیحی عقیدت مندوں سے واقعے پر معذرت کا اظہار بھی کیا۔

اسرائیلی ڈیفنس فورسز نے بھی وائرل ہونے والی تصویر کی تصدیق کرتے ہوئے اسے انتہائی سنگین قرار دیا ہے۔ فوج کا کہنا ہے کہ فوجی کا یہ عمل ان کی اقدار کے منافی ہے اور ناردرن کمانڈ اس واقعے کی تحقیقات کر رہی ہے۔ حکام کے مطابق ملوث افراد کے خلاف مناسب کارروائی عمل میں لائی جائے گی اور وہ مقامی برادری کے ساتھ مل کر مجسمے کو دوبارہ نصب کرنے کے لیے کوشاں ہیں۔

اسرائیلی فوج کا مزید کہنا تھا کہ ان کا مقصد جنوبی لبنان میں حزب اللہ کے بنیادی ڈھانچے کو ختم کرنا ہے اور وہ مذہبی مقامات یا علامات کو نقصان پہنچانے کا کوئی ارادہ نہیں رکھتے۔

یہ واقعہ لبنان کے سرحدی علاقے دیبل کے مسیحی گاؤں میں پیش آیا، جہاں اسرائیلی فوج کئی ہفتوں سے قابض ہے اور علاقے کے ہزاروں رہائشی نقل مکانی پر مجبور ہوئے ہیں۔ مقامی پادری فادی فلفل نے اس عمل کو مقدس علامات کی بے حرمتی قرار دیا ہے۔

اسرائیل میں تعینات امریکی سفیر مائیک ہکابی نے بھی واقعے کی مذمت کرتے ہوئے ملوث افراد کے خلاف فوری اور عوامی سطح پر سخت کارروائی کا مطالبہ کیا ہے۔

یہ واقعہ ایک ایسے وقت میں پیش آیا ہے جب اسرائیل اور لبنان کے درمیان دس روزہ جنگ بندی کا معاہدہ ہوا ہے۔ لبنان کے سرکاری حکام کے مطابق اسرائیلی جارحیت کے نتیجے میں اب تک تقریباً تئیس سو افراد ہلاک اور دس لاکھ سے زائد بے گھر ہو چکے ہیں۔ یاد رہے کہ جولائی دو ہزار پچیس میں بھی غزہ کے واحد کیتھولک چرچ پر اسرائیلی حملے میں تین افراد ہلاک اور پادری زخمی ہوئے تھے، جس پر عالمی سطح پر شدید تنقید کی گئی تھی۔