ایران کا ٹرمپ کے دباؤ کو مسترد، مذاکرات کو ‘سرنڈر ڈیل’ قرار دے دیا

ایرانی پارلیمنٹ کے اسپیکر محمد باقر قالیباف نے واضح کیا ہے کہ دباؤ کے تحت کسی بھی قسم کے مذاکرات ناقابل قبول ہیں۔ سوشل میڈیا پر جاری اپنے پیغام میں انہوں نے ڈونلڈ ٹرمپ پر الزام عائد کیا کہ وہ سفارتی بات چیت کو ہتھیار ڈالنے کی میز میں تبدیل کرنے کی کوشش کر رہے ہیں۔

قالیباف نے کہا کہ آبنائے ہرمز پر ناکہ بندی اور جنگ بندی کی خلاف ورزی کے ذریعے امریکی صدر یہ غلط اندازہ لگا رہے ہیں کہ ایران کو جھکایا جا سکتا ہے۔ انہوں نے زور دیا کہ طاقت کے استعمال سے سفارت کاری میں نتائج حاصل نہیں ہوتے اور ایران دھمکیوں کے سائے میں مذاکرات نہیں کرے گا۔ انہوں نے مزید کہا کہ گزشتہ دو ہفتوں کے دوران ایران نے اپنی تیاریوں کو مزید مستحکم کیا ہے تاکہ ضرورت پڑنے پر نئی صلاحیتوں کا مظاہرہ کیا جا سکے۔

ایران کے نائب وزیر خارجہ سعید خطیب زادہ کا کہنا ہے کہ امریکہ کو اپنے غیر ضروری مطالبات سے پیچھے ہٹنا ہوگا اور ایرانی عوام کے حقوق کا احترام کرنا ہوگا۔ انہوں نے تسلیم کیا کہ واشنگٹن ماضی میں عسکری راستے اختیار کرتا رہا ہے تاہم اب بھی سفارت کاری ہی واحد قابل عمل راستہ ہے۔

وزارت خارجہ کے ترجمان اسماعیل بقائی نے تہران میں پریس کانفرنس کرتے ہوئے کہا کہ امریکہ مذاکرات میں مخلص نہیں ہے اور ماضی کی غلطیوں کا اعادہ کرنے پر ایران فیصلہ کن جواب دینے کا حق رکھتا ہے۔ انہوں نے امریکی تجاویز کو غیر حقیقت پسندانہ قرار دیتے ہوئے کہا کہ ایران کے جوہری مواد کی منتقلی کبھی بھی کسی بات چیت کا حصہ نہیں رہی۔

ترجمان نے مزید کہا کہ تہران کو امریکہ پر کوئی اعتماد نہیں ہے اور وہ اپنے قومی مفادات کا تحفظ جاری رکھے گا۔ فی الحال ایران کی جانب سے مزید مذاکرات میں شامل ہونے کا کوئی ارادہ نہیں ہے۔ اسماعیل بقائی نے واشنگٹن پر الزام لگایا کہ وہ سفارت کاری کو آگے بڑھانے میں سنجیدگی نہیں دکھا رہا اور اس نے جارحانہ اقدامات کے ذریعے جنگ بندی کی خلاف ورزی کی ہے۔ انہوں نے واضح کیا کہ امریکہ ماضی کے تجربات سے سیکھنے میں ناکام رہا ہے اور موجودہ حالات میں مذاکرات ممکن نہیں ہیں۔