لندن (اے ایف پی) امریکہ نے ایران کے ساتھ جنگ کے خاتمے تک اس کے بحری جہازوں کا گھیراؤ کرنے کا عزم ظاہر کیا ہے تاہم تجزیہ کاروں اور شپ ٹریکنگ ڈیٹا کے مطابق اس آپریشن کی کامیابی کا اندازہ لگانا انتہائی پیچیدہ صورتحال اختیار کر گیا ہے۔
لائیڈز لسٹ انٹیلی جنس کی تجزیہ کار بریجٹ ڈیاکون کا کہنا ہے کہ امریکی انتظامیہ کی جانب سے متضاد معلومات اور ڈیٹا کے اجراء میں تاخیر کے باعث ناکہ بندی کے دائرہ کار اور پیرامیٹرز پر ابہام پایا جاتا ہے۔
آبنائے ہرمز میں کشیدگی کا آغاز 28 فروری کو امریکہ اور اسرائیل کی جانب سے ایران پر حملوں کے بعد ہوا، جس کے جواب میں ایرانی فورسز نے اپنی جنوب مشرقی ساحلی پٹی اور عمان کے شمالی حصے کے درمیان گزرنے والے جہازوں کو نشانہ بنا کر آبنائے کو بند کر دیا تھا۔ بعد ازاں جنگ بندی کے دوران مذاکرات کی ناکامی پر 13 اپریل کو امریکی جوائنٹ چیفس آف سٹاف کے چیئرمین ڈین کین نے خلیج عمان کے دہانے پر جوابی ناکہ بندی کا اعلان کیا۔
امریکی سینٹرل کمانڈ کے مطابق یہ پابندیاں ایران کی بندرگاہوں سے آنے اور جانے والے تمام ممالک کے جہازوں پر لاگو ہیں، جبکہ امریکی بحریہ نے واضح کیا ہے کہ وہ ایران سے منسلک تیل، اسلحہ اور جوہری مواد لے جانے والے مشکوک جہازوں کو بھی روکے گی۔ امریکی دفاعی حکام کا اب مؤقف ہے کہ آپریشن کی کامیابی کا معیار یہ نہیں کہ کتنے جہاز ناکہ بندی عبور کر گئے، بلکہ یہ ہے کہ ایران کی تجارت کو کتنا نقصان پہنچا۔
میری ٹائم فرمز کے سیٹلائٹ امیجز اور ٹریکنگ ڈیٹا سے ظاہر ہوتا ہے کہ درجنوں ایسے جہاز ناکہ بندی کی لائن عبور کر چکے ہیں جو امریکی پابندیوں کی زد میں ہیں۔ امریکی سینٹرل کمانڈ نے 17 اپریل تک دعویٰ کیا تھا کہ کوئی جہاز ناکہ بندی سے فرار نہیں ہوا، تاہم بعد ازاں اعداد و شمار میں تبدیلی دیکھی گئی۔
بحری جہازوں کی جانب سے ٹریکنگ ٹرانسپونڈرز بند کر کے یا اپنی منزل عراق ظاہر کر کے ناکہ بندی سے بچنے کی کوششیں بھی جاری ہیں۔ کچھ جہازوں نے خلیج کے اندر داخل ہو کر ایران کا تیل منتقل کیا، جبکہ کچھ جہازوں نے آبنائے سے نکلتے وقت اپنے سگنلز بند کر دیے۔
اگرچہ امریکی حکام نے انسانی ہمدردی کی بنیاد پر بعض جہازوں کو استثنیٰ دینے کا اشارہ دیا تھا، تاہم اس کی شرائط واضح نہیں کی گئیں۔ ٹریکنگ ڈیٹا کے مطابق کم از کم دو جہاز ایرانی بندرگاہوں پر خوراک کی ترسیل کے بعد بلا روک ٹوک خلیج سے باہر نکلنے میں کامیاب رہے۔
صدر ڈونلڈ ٹرمپ کے بیجنگ کے دورے اور چینی صدر شی جن پنگ کے ساتھ…
اسلام آباد میں پاکستان تحریک انصاف کے بانی چیئرمین سے ملاقات کے لیے چھ رکنی…
اقوام متحدہ کے سابق ہتھیاروں کے معائنہ کار اور امریکی میرین کور کے انٹیلی جنس…
وزیراعظم شہباز شریف کی جانب سے گلگت بلتستان کے دورے کے دوران خطے میں چار…
کراچی میں پانی کی چوری کی روک تھام کے لیے قائم خصوصی تھانہ خود سنگین…
امریکی صدر ڈونلڈ ٹرمپ چین کے دورے پر پہنچ گئے ہیں، ان کے ہمراہ امریکہ…