ایران کے پاس ‘اچھا معاہدہ’ کرنے کا موقع ہے، امریکی وزیر دفاع ہیگسیٹ

امریکی وزیر دفاع پیٹ ہیگستھ نے کہا ہے کہ ایران کے خلاف امریکی بحری ناکہ بندی کا دائرہ کار عالمی سطح پر وسیع کیا جا رہا ہے۔ جمعہ چوبیس اپریل کو واشنگٹن میں صحافیوں سے گفتگو کرتے ہوئے انہوں نے واضح کیا کہ آبنائے ہرمز سے اب کوئی بھی جہاز امریکی بحریہ کی اجازت کے بغیر گزر نہیں سکتا۔

پیٹ ہیگستھ نے تہران پر زور دیا کہ وہ واشنگٹن کے ساتھ ایک بہتر معاہدہ کرنے کا موقع ضائع نہ کرے۔ انہوں نے صدر ٹرمپ کے موقف کو دہراتے ہوئے کہا کہ امریکہ کسی معاہدے کے لیے بے چین نہیں ہے اور ہمارے پاس وقت کی کوئی کمی نہیں ہے۔ انہوں نے کہا کہ ایران کے پاس اب بھی دانشمندی کا مظاہرہ کرنے اور مذاکرات کی میز پر آنے کا موقع موجود ہے، بشرطیکہ وہ جوہری ہتھیاروں کے حصول کے عزائم کو قابل تصدیق طریقے سے ترک کر دے۔

اس موقع پر امریکی جنرل ڈین کین نے بتایا کہ امریکی سینٹرل کمانڈ ایرانی بندرگاہوں پر سخت ناکہ بندی برقرار رکھے ہوئے ہے۔ ان کے مطابق جمعہ کی صبح تک چونتیس بحری جہازوں کو واپس موڑا جا چکا ہے، جبکہ بحر الکاہل اور بحر ہند میں بھی ایرانی جہازوں کی نقل و حرکت پر نظر رکھی جا رہی ہے۔ جنرل کین نے واضح کیا کہ کسی بھی قومیت کا جہاز جو ایرانی حدود میں داخل ہو رہا ہو یا وہاں سے آ رہا ہو، وہ ناکہ بندی کے دائرے میں ہے اور امریکی فوج انہیں روکنے کے لیے مکمل طور پر تیار ہے۔

یاد رہے کہ ایران کے خلاف امریکی بحری ناکہ بندی کا آغاز تیرہ اپریل کو ہوا تھا۔ وزیر دفاع پیٹ ہیگستھ نے خبردار کیا ہے کہ آبنائے ہرمز میں بارودی سرنگیں بچھانے کی کوئی بھی کوشش جنگ بندی کی خلاف ورزی تصور کی جائے گی۔ انہوں نے الزام عائد کیا کہ ایران اپنی تیز رفتار کشتیوں کے ذریعے غیر ذمہ دارانہ حرکات کر رہا ہے جس سے خطے میں نقل و حمل کے عمل میں خطرات بڑھ گئے ہیں۔

دوسری جانب ذرائع نے خبر رساں ادارے کو بتایا ہے کہ امریکہ اور ایران کے درمیان مذاکرات کا نیا دور جلد پاکستان میں متوقع ہے، جبکہ اس سے قبل رواں ہفتے ہونے والی بات چیت کسی نتیجے پر پہنچے بغیر ختم ہو گئی تھی۔