ایران کے جوابی حملوں سے امریکی فوجی اڈوں کو توقع سے زیادہ نقصان پہنچا، رپورٹ

اٹھائیس فروری سے ایران کے خلاف امریکہ اور اسرائیل کی جانب سے شروع کیے گئے حملوں کے بعد سے ایران نے مشرق وسطیٰ میں امریکی فوجی اڈوں اور تنصیبات کو وسیع پیمانے پر نقصان پہنچایا ہے۔ این بی سی نیوز کی رپورٹ کے مطابق یہ نقصانات عوامی سطح پر تسلیم کیے گئے اعداد و شمار سے کہیں زیادہ سنگین ہیں اور ان کی مرمت پر اربوں ڈالر کے اخراجات متوقع ہیں۔

رپورٹ میں انکشاف کیا گیا ہے کہ ایران نے سات ممالک میں واقع امریکی فوجی اڈوں پر جوابی حملوں کے دوران درجنوں اہداف کو نشانہ بنایا۔ ان اہداف میں گودام، کمانڈ ہیڈ کوارٹرز، طیاروں کے ہینگرز، سیٹلائٹ کمیونیکیشن کا انفراسٹرکچر، رن ویز، جدید ریڈار سسٹمز اور درجنوں طیارے شامل ہیں۔

حملوں میں ایران نے میزائلوں اور ڈرونز کے ساتھ ساتھ ایف فائیو لڑاکا طیاروں کا بھی استعمال کیا۔ یہ ان امریکی دعووں کے برعکس ہے جن میں کہا گیا تھا کہ ایرانی فضائیہ نے امریکی اہداف کے خلاف لڑاکا طیاروں کا استعمال نہیں کیا۔

پینٹاگون نے تاحال امریکی فوجی اڈوں کو پہنچنے والے نقصانات کی تفصیلات عوامی نہیں کی ہیں جبکہ یو ایس سینٹرل کمانڈ نے جنگی نقصانات کے جائزے پر کسی بھی قسم کا تبصرہ کرنے سے گریز کیا ہے۔

رپورٹ کے مطابق ریپبلکن قانون سازوں کی جانب سے پینٹاگون کے اعلیٰ حکام پر تنقید کی جا رہی ہے کہ وہ نقصانات کی نوعیت یا مرمت کے تخمینہ شدہ اخراجات کے بارے میں معلومات فراہم نہیں کر رہے۔ ایک کانگریشنل معاون نے کہا کہ ہم ہفتوں سے پوچھ رہے ہیں لیکن کوئی واضح جواب نہیں مل رہا، جبکہ پینٹاگون ریکارڈ توڑ بجٹ کا مطالبہ کر رہا ہے۔

ان نقصانات اور مرمت پر اٹھنے والے اخراجات کے بعد اب امریکی حلقوں میں اس بحث نے دوبارہ جنم لیا ہے کہ آیا ایران جیسے حریف کے اتنے قریب امریکی اڈوں کو برقرار رکھنا دانشمندانہ فیصلہ ہے۔