متحدہ عرب امارات کا اوپیک اور اوپیک پلس سے علیحدگی کا اعلان، عالمی تیل منڈی کو بڑا دھچکا

متحدہ عرب امارات نے منگل کے روز پیٹرولیم برآمد کرنے والے ممالک کی تنظیم اوپیک اور اوپیک پلس سے علیحدگی کا اعلان کر دیا ہے۔ اس فیصلے کو تیل برآمد کرنے والے گروپ اور اس کے غیر اعلانیہ قائد سعودی عرب کے لیے ایک بڑا دھچکا قرار دیا جا رہا ہے۔ یہ پیش رفت ایسے وقت میں ہوئی ہے جب ایران کے ساتھ جنگ نے عالمی معیشت کو ہلا کر رکھ دیا ہے اور توانائی کے شعبے میں تاریخی بحران پیدا کر دیا ہے۔

اوپیک کے ایک دیرینہ رکن ملک کے طور پر متحدہ عرب امارات کا انخلا تنظیم کے لیے شدید انتشار کا باعث بن سکتا ہے۔ اس سے تنظیم کی ساکھ کمزور ہوگی جو جغرافیائی سیاست اور پیداواری کوٹے جیسے معاملات پر اندرونی اختلافات کے باوجود ہمیشہ ایک متحد محاذ پیش کرنے کی کوشش کرتی رہی ہے۔

خلیجی ممالک پہلے ہی آبنائے ہرمز سے تیل کی ترسیل میں شدید مشکلات کا شکار ہیں۔ یہ گزرگاہ ایران اور عمان کے درمیان واقع ہے جہاں سے دنیا بھر کا پانچواں حصہ خام تیل اور مائع قدرتی گیس گزرتی ہے، تاہم ایرانی دھمکیوں اور بحری جہازوں پر حملوں کے باعث ترسیل کا عمل بری طرح متاثر ہوا ہے۔

امارات کا اوپیک سے نکلنا امریکی صدر ڈونلڈ ٹرمپ کے لیے ایک بڑی کامیابی تصور کیا جا رہا ہے۔ ٹرمپ ماضی میں اوپیک پر تیل کی قیمتیں بڑھا کر دنیا کو لوٹنے کا الزام عائد کرتے رہے ہیں۔ امریکی صدر کا موقف رہا ہے کہ امریکہ خلیجی ممالک کے دفاع کی ذمہ داری اٹھاتا ہے جبکہ یہ ممالک مہنگی قیمتیں وصول کر کے اس تعاون کا غلط فائدہ اٹھاتے ہیں۔

یہ فیصلہ ایک ایسے وقت میں سامنے آیا ہے جب متحدہ عرب امارات نے اپنے عرب اتحادیوں پر کڑی تنقید کی ہے۔ امارات کا ماننا ہے کہ جنگ کے دوران ایرانی حملوں سے تحفظ فراہم کرنے کے لیے دیگر عرب ممالک نے خاطر خواہ کردار ادا نہیں کیا۔

متحدہ عرب امارات کے صدر کے سفارتی مشیر انور قرقاش نے پیر کے روز گلف انفلوئنسرز فورم سے خطاب کرتے ہوئے اس مایوسی کا اظہار کیا۔ انہوں نے کہا کہ خلیج تعاون کونسل کے ممالک نے ایک دوسرے کی لاجسٹک مدد تو کی، لیکن سیاسی اور عسکری اعتبار سے ان کا موقف تاریخی طور پر سب سے کمزور رہا ہے۔

انور قرقاش کا کہنا تھا کہ عرب لیگ سے ایسی کمزور پوزیشن کی توقع تو تھی، تاہم خلیج تعاون کونسل کی جانب سے اس طرح کے رویے نے انہیں حیران کر دیا ہے۔