امریکی صدر ڈونلڈ ٹرمپ نے وائٹ ہاؤس میں برطانوی بادشاہ چارلس کے اعزاز میں دیے گئے عشائیے کے دوران ایران کے جوہری پروگرام پر گفتگو کرتے ہوئے دعویٰ کیا ہے کہ برطانوی بادشاہ ایران کو جوہری ہتھیار حاصل کرنے سے روکنے کے حوالے سے ان کے مؤقف سے مکمل اتفاق کرتے ہیں۔
صدر ٹرمپ نے عشائیے سے خطاب کرتے ہوئے کہا کہ مشرق وسطیٰ میں جاری کشیدگی کے حوالے سے امریکی کوششیں کامیاب ہو رہی ہیں اور انہوں نے عسکری طور پر اپنے حریف کو شکست دے دی ہے۔ انہوں نے مزید کہا کہ وہ اس حریف کو کبھی بھی جوہری ہتھیار حاصل کرنے کی اجازت نہیں دیں گے اور اس معاملے پر بادشاہ چارلس ان سے بھی زیادہ سخت مؤقف رکھتے ہیں۔
برطانوی بادشاہ چارلس نے عشائیے کے موقع پر اپنی تقریر میں ایران یا مشرق وسطیٰ کی جنگ کا کوئی تذکرہ نہیں کیا۔ واضح رہے کہ برطانوی بادشاہ حکومتی پالیسیوں کے ترجمان نہیں ہوتے۔ اس معاملے پر جب برطانوی سفارت خانے سے رابطہ کیا گیا تو انہوں نے بکنگھم پیلس سے رجوع کرنے کا مشورہ دیا، تاہم محل کی جانب سے فوری طور پر کوئی ردعمل سامنے نہیں آیا۔
اس سے قبل امریکی کانگریس سے خطاب کے دوران بادشاہ چارلس نے ایران کا نام لیے بغیر نیٹو اور یوکرین کی حمایت پر زور دیا تھا اور تنہائی پسندی کی پالیسی کے خطرات سے خبردار کیا تھا۔
برطانیہ اور امریکہ گزشتہ کئی برسوں سے اس بات پر متفق ہیں کہ تہران کو جوہری ہتھیاروں سے دور رہنا چاہیے۔ دوسری جانب ایران کا مؤقف ہے کہ وہ جوہری ہتھیار حاصل کرنے کا ارادہ نہیں رکھتا اور ایٹمی عدم پھیلاؤ کے معاہدے کے تحت پرامن مقاصد کے لیے جوہری ٹیکنالوجی کے حصول کا حق رکھتا ہے۔
