نیویارک کے میئر زوہراں ممدانی کا شاہ چارلس سے کوہ نور ہیرا واپس کرنے کا مطالبہ

نیویارک کے میئر زہران ممدانی نے برطانوی بادشاہ چارلس کے دورہ نیویارک کے دوران کوہ نور ہیرا واپس کرنے کا مطالبہ کر دیا۔ یہ مطالبہ بادشاہ اور ملکہ کمیلا کی نائن الیون میموریل تقریب میں شرکت سے قبل سامنے آیا۔

میئر ممدانی نے میڈیا سے گفتگو کرتے ہوئے کہا کہ اگر انہیں بادشاہ سے تنہائی میں بات کرنے کا موقع ملا تو وہ ان پر زور دیں گے کہ وہ کوہ نور ہیرا واپس کریں۔ انہوں نے مزید کہا کہ اس موقع پر ان کی اولین ترجیح دہشت گردی کے حملوں میں ہلاک ہونے والوں کو خراج تحسین پیش کرنا ہے۔

تقریب کے دوران جب بادشاہ چارلس اور میئر ممدانی کی ملاقات ہوئی تو دونوں کے درمیان مختصر گفتگو ہوئی اور بادشاہ کو مسکراتے ہوئے دیکھا گیا، تاہم یہ واضح نہیں ہو سکا کہ میئر نے بادشاہ کے سامنے اس حساس موضوع کو اٹھایا یا نہیں۔

ایک سو چھ قیراط وزنی یہ ہیرا اس وقت ٹاور آف لندن میں موجود ہے اور برطانوی شاہی زیورات کا حصہ ہے۔ اٹھارویں صدی میں برطانوی سلطنت کے قبضے میں آنے سے قبل یہ ہیرا مغل شہنشاہوں، ایرانی شاہوں اور سکھ مہاراجوں کے پاس رہا۔ سن اٹھارہ سو انچاس میں پنجاب کی سلطنت نے ایک معاہدے کے تحت یہ ہیرا ملکہ وکٹوریہ کو دیا تھا۔

بھارت سمیت پاکستان، افغانستان اور ایران بھی اس ہیرے پر اپنے دعوے پیش کرتے رہے ہیں۔

دوسری جانب ریفارم یو کے پارٹی کے رہنما ضیاء یوسف نے میئر کے بیان کو بادشاہ کی توہین قرار دیا ہے۔ انہوں نے سماجی رابطے کی ویب سائٹ پر کہا کہ یہ ہیرا ٹاور آف لندن کی زینت ہے اور وہیں رہے گا۔