غزہ جانے والے امدادی جہازوں کو بین الاقوامی پانیوں میں اسرائیلی فورسز کی جانب سے روکے جانے کا دعویٰ

غزہ کے لیے امدادی سامان لے جانے والے بحری جہازوں کو یونان کے قریب بین الاقوامی سمندری حدود میں اسرائیلی فورسز کی جانب سے روکے جانے کا انکشاف ہوا ہے۔ اس کارروائی کے دوران اسرائیلی بحری جہازوں اور ڈرونز کا استعمال کیا گیا۔

گلوبل صمود فلوٹیلا کی جانب سے جاری کردہ بیان میں تصدیق کی گئی ہے کہ ان کے جہازوں کو بدھ کے روز اسرائیلی فورسز نے گھیرے میں لے لیا تھا۔ اس حوالے سے سماجی رابطوں کی ویب سائٹس پر جاری پیغامات میں کارکنوں نیو او کونر اور فلیپا فالتھ نے بتایا کہ انہیں اپنی کشتیوں کے قریب اسرائیلی بحری جہاز اور ڈرونز نظر آئے۔

نیو او کونر نے اپنی پوسٹس میں بتایا کہ وہ گلوبل صمود فلوٹیلا کے عملے کا حصہ ہیں اور انہوں نے 12 اپریل کو بارسلونا سے سفر کا آغاز کیا تھا۔ سوشل میڈیا پر وائرل ہونے والی ویڈیوز کے بارے میں تاحال آزادانہ تصدیق نہیں ہو سکی تاہم یہ ویڈیوز 29 اپریل سے قبل انٹرنیٹ پر موجود نہیں تھیں۔

اسرائیلی فورسز کی جانب سے 29 اپریل کو ہی غزہ جانے والے امدادی جہازوں کو اپنے قبضے میں لینے کے عمل کا آغاز کرنے کا دعویٰ کیا گیا تھا۔ جبکہ فلوٹیلا کے منتظمین نے بھی اس بات کی تصدیق کی ہے کہ 30 اپریل کو اسرائیلی حکام نے ان کی امدادی کھیپ کو روک لیا تھا۔