نوبل انعام یافتہ نرگس محمدی جیل میں طبیعت بگڑنے پر ہسپتال منتقل

تہران میں نوبل انعام یافتہ ایرانی انسانی حقوق کی کارکن نرگس محمدی کی طبیعت اچانک بگڑنے کے بعد انہیں جیل سے ہسپتال منتقل کر دیا گیا ہے۔

ان کی فاؤنڈیشن کے مطابق نرگس محمدی دو مرتبہ مکمل طور پر بے ہوش ہوئیں اور انہیں دل کی سنگین پیچیدگیوں کا سامنا کرنا پڑا۔ ڈاکٹروں نے ان کی حالت کو تشویشناک قرار دیتے ہوئے واضح کیا ہے کہ جیل کے اندر ان کا مناسب طبی علاج ممکن نہیں ہے۔

نرگس محمدی ایران کے شمال مغربی شہر زنجان کی جیل میں قید تھیں۔ انہیں گزشتہ برس ۱۲ دسمبر کو مشہد سے گرفتار کیا گیا تھا، جس کے بعد فروری میں ایک عدالت نے انہیں ریاست کے خلاف سازش سمیت مختلف الزامات کے تحت سات سال سے زائد قید کی سزا سنائی تھی۔

ان کے اہل خانہ نے الزام عائد کیا ہے کہ گرفتاری کے دوران نرگس محمدی کو جسمانی تشدد کا نشانہ بنایا گیا، جس کے نتیجے میں ان کے سر اور گردن سمیت جسم کے دیگر حصوں پر چوٹیں آئیں اور یہی ان کی بگڑتی ہوئی صحت کی بنیادی وجہ بنی۔

نوبل کمیٹی نے فروری میں ہی نرگس محمدی کے ساتھ کیے جانے والے سلوک کو جان لیوا قرار دیتے ہوئے اس کی شدید مذمت کی تھی۔ وہ اس سے قبل سکیورٹی سے متعلق مقدمات میں تیرہ سال سے زائد کی قید کاٹ چکی ہیں، تاہم طبی بنیادوں پر انہیں ۲۰۲۴ کے آخر میں عارضی رہائی ملی تھی۔

ایرانی حکام کی جانب سے بدسلوکی کے ان الزامات پر تاحال کوئی باضابطہ ردعمل سامنے نہیں آیا ہے۔